ଭୁବନେଶ୍ବର: ଏବେ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ପ୍ରଚାର ଜମିବ। ଏଣିକି ସରପଞ୍ଚ, ସମିତି ସଭ୍ୟ ଓ ଜିଲା ପରିଷଦ ସଭ୍ୟ ମାଇକ ଓ ଗାଡ଼ିରେ ପ୍ରଚାର କରିପାରିବେ। ଆଜି ରାଜ୍ୟ ସରକାରଙ୍କ ପକ୍ଷରୁ ପଞ୍ଚାୟତ ନିର୍ବାଚନରେ ମାଇକ ଓ ଗାଡ଼ି ବ୍ୟବହାର କଟକଣା ଉଠାଇ ଦିଆଯାଇଛି। ତେବେ ଆଶାୟୀ ପ୍ରାର୍ଥୀମାନେ ସ୍ଥାନୀୟ ପ୍ରଶାସନଠାରୁ ଅନୁମତି ଆଣି ମାଇକ ଓ ଗାଡ଼ି ବ୍ୟବହାର କରିପାରିବେ ବୋଲି ଆଜି ଜିଲାପାଳମାନଙ୍କୁ ରାଜ୍ୟ ନିର୍ବାଚନ କମିଶନ ଚିଠି ଲେଖିଛନ୍ତି।
ନିର୍ବାଚନ ପ୍ରଚାରରେ ମାଇକ ଓ ଗାଡ଼ି ବ୍ୟବହାର ପାଇଁ ଜିଲାପାଳଙ୍କୁ ଅନୁମତି ଦେବା ସମ୍ପର୍କରେ ଚିଠି ଲେଖିଲେ ରାଜ୍ୟ ନିର୍ବାଚନ କମିଶନ। ପ୍ରଚାର ପାଇଁ ମାଇକ ଅନୁମତି ସ୍ଥାନୀୟ ତହସିଲଦାର ଦେଇପାରିବେ। କମିଶନରେଟ ପୁଲିସ ଅନ୍ତର୍ଭୁକ୍ତ ବ୍ଲକଗୁଡ଼ିକ ପାଇଁ ଡିସିପି ଅନୁମତି ଦେବେ। ଗାଡ଼ି ପାଇଁ ସରପଞ୍ଚ ଓ ସମିତି ସଭ୍ୟଙ୍କୁ ବିଡିଓ ଅନୁମତି ଦେଇପାରିବେ। ସେହିପରି ଜିଲା ପରିଷଦ ସଭ୍ୟ ପାଇଁ ଉପଜିଲାପାଳ ଅନୁମତି ଦେବେ ବୋଲି ରାଜ୍ୟ ନିର୍ବାଚନ କମିଶନ ଜିଲାପାଳମାନଙ୍କୁ ଲେଖିଥିବା ଚିଠିରେ ଉଲ୍ଲେଖ କରାଯାଇଛି।
