ସମ୍ପ୍ରତି ପୁରୀ ଓ ବୀରମିତ୍ରପୁର ହାଜତ ମୃତ୍ୟୁ ମାମଲା ନେଇ ପରିସ୍ଥିତି ଉଷ୍ମ ଥିବାବେଳେ ଆଜି ମୋହନା ଥାନା ପରିସରରୁ ଜଣେ ଅଭିଯୁକ୍ତ ଗଞ୍ଜେଇ ମାଫିଆ ଫେରାର ହେବା ଓ ପୁଲିସ ତାର ଟେର ନ ପାଇବା ଭଳି ଘଟଣା ଘଟିଛି। କର୍ତ୍ତବ୍ୟର ଅବହେଳା ଯୋଗୁ ଗଜପତି ଏସପି ତପନ ପଟ୍ଟନାୟକ ୪ ପୁଲିସ କର୍ମଚାରୀଙ୍କୁ ନିଲମ୍ବନ କରିଛନ୍ତି। ନିଲମ୍ବିତ ହୋଇଥିବା କର୍ମଚାରୀମାନେ ହେଉଛନ୍ତି କନଷ୍ଟେବଳ ବିଶ୍ୱଜିତ୍ ସାଗର ଓ ଉମାସ୍କନ ସାଗର ଏବଂ ହୋମଗାର୍ଡ ଦୁର୍ଜୟଧାନା କର୍ଜୀ ଓ ସେଖର ପ୍ରସାଦ ନାୟକ।
ସୂଚନା ଅନୁଯାୟୀ, ଏନଡିପିଏସ୍ ମାମଲାରେ ଗିରଫ ହୋଇଥିବା ଅଭିଯୁକ୍ତ ସନାତନ କରାଡ ଗତ ୧୩ ତାରିଖ ସକାଳୁ ମୋହନା ଥାନାରୁ ଚମ୍ପଟ ମାରିଛି। ଆସାମୀ ଫେରାର ଘଟଣାରେ ସୁରକ୍ଷା ବ୍ୟବସ୍ଥା ଢିଲା ଓ ଦାୟିତ୍ୱହୀନତା ପାଇଁ ଦୁଇ ଜଣ କନଷ୍ଟେବଳ ସମେତ ଦୁଇ ଜଣ ହୋମଗାର୍ଡଙ୍କୁ ନିଲମ୍ବିତ କରାଯାଇଥିବା ସୁଚନା ଦେଇଛନ୍ତି ଏସପି। ଆସାମୀ ଫେରାର ଘଟଣାରେ ମୋହନା ଥାନା କେସ ନଂ ୧୨୦/୨୦୨୦ରେ ଏକ ମାମଲା ରୁଜୁ କରାଯାଇଛି।
Comments are closed.