କୃଷକ ସଙ୍ଗଠନ ପକ୍ଷରୁ ଭାରତ ବନ୍ଦ ପାଳନ, ସାମିଲ ହେଲେ ଟ୍ରକ୍ ଓ ବ୍ୟବସାୟୀ ସଂଘ

ନୂଆଦିଲ୍ଲୀ : ପଞ୍ଜାବରୁ ଦିଲ୍ଲୀ ଯାଉଥିବା ଚାଷୀଙ୍କୁ ହରିୟାଣା-ପଞ୍ଜାବର ଶମ୍ଭୁ ବର୍ଡର ପୁଲିସ ଓ ପାରାମିଲିଟ୍ରି ଫୋର୍ସ ଅଟକାଇ ରଖିଛନ୍ତି । ଏହା ମଧ୍ୟରେ ସଂଯୁକ୍ତ କିଷାନ ମୋର୍ଚ୍ଚା ଆଜି ଭାରତ ବନ୍ଦ ଡାକରା ଦେଇଛି । ସାରା ଦେଶରେ ବନ୍ଦ ପାଳନ ପାଇଁ ସମସ୍ତ ଚାଷୀ ୟୁନିୟନ୍ ସହ ଟ୍ରକ୍ ଓ ଟ୍ରେଡ୍ ୟୁନିୟନ୍ ମଧ୍ୟ ଚାଷୀଙ୍କୁ ସମର୍ଥନ କରୁଛନ୍ତି । ପଞ୍ଜାବଠୁ ଆରମ୍ଭ କରି ହରିୟାଣା ଓ ଦିଲ୍ଲୀଠୁ ଆରମ୍ଭ କରି ୟୁପି ପର୍ଯ୍ୟନ୍ତ ହାଇଆଲର୍ଟ ଜାରି କରାଯାଇଛି । ତେବେ ଏହି ବନ୍ଦକୁ ରୋକିବା ପାଇଁ କେନ୍ଦ୍ର ସରକାର ଚାଷୀ ସଙ୍ଗଠନ  ସହ ଗୁରୁବାର ସନ୍ଧ୍ୟାରେ ଆଲୋଚନା କରିଥିଲେ । ରାତି ସାଢେ ୧ଟା ପର୍ଯ୍ୟନ୍ତ ଆଲୋଚନା ଚାଲିଲା । କିନ୍ତୁ କୌଣସି ନିଷ୍କର୍ସ ବାହାରିପାରିଲାନି । ଏହା ମଧ୍ୟରେ ଦିଲ୍ଲୀର ସମସ୍ତ ବର୍ଡରରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ଅନ୍ୟପଟେ ଅନେକ ସ୍ଥାନରେ ଭାରତ ବନ୍ଦର ପ୍ରଭାବ ପଡିଛି । ଗାଡି ଚଳାଚଳ ପ୍ରଭାବିତ ହେବା ସହ ଅନେକ ସ୍ଥାନରେ ଦୋକାନ ବଜାର ବନ୍ଦ ରହିଛି ।