ନୂଆଦିଲ୍ଲୀ : ନିର୍ବାଚନ କମିସନ (ଇସି)ଙ୍କ ପକ୍ଷରୁ ଲୋକସଭାର ୫୪୩ ଆସନର ଫଳାଫଳ ଚଳିତମାସ ୪ରେ ଘୋଷିତ ହୋଇସାରିଛି। ତେବେ ନିର୍ବାଚିତ ସାଂସଦଙ୍କ ମଧ୍ୟରେ ୯୩ ପ୍ରତିଶତ କୋଟିପତି ବୋଲି ନିର୍ବାଚନ ଉପରେ ନଜର ରଖୁଥିବା ସଂସ୍ଥା ଏଡିଆର (ଆସୋସିଏସନ ଫର ଡେମୋକ୍ରାଟି ରିଫର୍ମସ) ପକ୍ଷରୁ ଗୁରୁବାର ପ୍ରକାଶିତ ରିପୋର୍ଟରେ ଉଲ୍ଲେଖ କରାଯାଇଛି।
୫୪୩ ମଧ୍ୟରୁ ୫୦୪ ସାଂସଦ କୋଟିପତି ତାଲିକାଭୁକ୍ତ ହୋଇଛନ୍ତି। ନବ ନିର୍ବାଚିତଙ୍କ ମଧ୍ୟରେ ବିଜେପିର ସର୍ବାଧିକ ୨୪୦ ସାଂସଦ ଥିବାବେଳେ ସେମାନଙ୍କ ମଧ୍ୟରୁ ୨୨୭ ଜଣ (୯୫ ପ୍ରତିଶତ) ହେଉଛନ୍ତି କୋଟିପତି। ସେମାନଙ୍କର ହାରାହାରି ସମ୍ପତ୍ତି ପରିମାଣ ୫୦.୦୪ କୋଟି ଟଙ୍କା ବୋଲି ରିପୋର୍ଟରୁ ଜଣାପଡିଛି। ତେବେ ଟିଡିପି ସାଂସଦଙ୍କ ହାରାହାରି ସମ୍ପତ୍ତି ୪୪୨. ୨୬ କୋଟି ଟଙ୍କା ବୋଲି ଜଣାପଡିଛି। ଅପରପକ୍ଷରେ ୯୯ ଆସନ ଅକ୍ତିଆର କରିଥିବା କଂଗ୍ରେସ ଦଳର ୯୩ ପ୍ରତିଶତ ସାଂସଦ କୋଟିପତି ବୋଲି ଜଣାପଡିଛି। ୫୭୦୫ କୋଟିର ସମ୍ପତ୍ତି ସହ ଟିଡିପି (ତେଲୁଗୁ ଦେଶମ ପାର୍ଟି)ର ଚନ୍ଦ୍ରଶେଖର ପେମାସାନି ସବୁଠୁ ଧନୀ ସାଂସଦର ମାନ୍ୟତାଲାଭ କରିଥିବାବେଳେ ତାଙ୍କ ପଛକୁ ବିଜେପିର କେ.ବିଶ୍ବେଶ୍ବର ରେଡ୍ଡି ( (୪୫୬୮ କୋଟି) ଓ ନବୀନ ଜିନ୍ଦଲ (୧୨୪୧ କୋଟି) ଯଥାକ୍ରମେ ଦ୍ବିତୀୟ ଓ ତୃତୀୟ ସ୍ଥାନରେ ରହିଛନ୍ତି। ଅପରପକ୍ଷରେ ନବନିର୍ବାଚିତଙ୍କ ମଧ୍ୟରୁ ୪୬ ପ୍ରତିଶତ ସାଂସଦଙ୍କ ବିରୋଧରେ ଅପରାଧିକ ମାମଲା ବିଚାରାଧୀନ ରହିଛି। ଅର୍ଥାତ ୫୪୩ ମଧ୍ୟରୁ ୨୫୧ ସାଂସଦଙ୍କ ବିରୋଧରେ ଏଭଳି ମାମଲା ରହିଥିବା ପ୍ରକାଶ। ବିଜେପିର ୯୪ (୩୯ ପ୍ରତିଶତ)ସାଂସଦ ଏବଂ କଂଗ୍ରେସର ୪୯ (୫୦ ପ୍ରତିଶତ)ଙ୍କ ବିରୋଧରେ ଅପରାଧିକ ମାମଲା ରହିଛି।
୨୦୦୯ ପରଠାରୁ ଏଭଳି ସାଂସଦଙ୍କ ସଂଖ୍ୟାରେ ୫୫ ପ୍ରତିଶତ ବୃଦ୍ଧି ଘଟିଥିବା କୁହାଯାଇଛି। ୫୪୩ ମଧ୍ୟରୁ ୧୭୦ ସାଂସଦଙ୍କ ବିରୋଧରେ ହତ୍ୟା, ଅପହରଣ, ବଳାତ୍କାର, ମହିଳାଙ୍କୁ ନିର୍ଯାତନା ଭଳି ଗୁରୁତର ଅପରାଧିକ ମାମଲା ବିଚାରାଧୀନ ରହିଥିବା ଜଣାପଡିଛି। ବିଜେପିର ୬୩, କଂଗ୍ରେସର ୩୨ ଏବଂ ଆରଜେଡି (ରାଷ୍ଟ୍ରୀୟ ଜନତା ଦଳ)ର ୪ ସାଂସଦଙ୍କ ବିରୋଧରେ ଗୁରୁତର ଅପରାଧିକ ମାମଲା ରହିଛି ବୋଲି ସେମାନେ ସତ୍ୟପାଠରେ ଦର୍ଶାଇଛନ୍ତି।
