ନୂଆଦିଲ୍ଲୀ: ସୁପ୍ରିମକୋର୍ଟ ଜାମ୍ମୁ-କାଶ୍ମୀର ସମ୍ପର୍କିତ ୮ଟି ପିଟିଶନର ଶୁଣାଣି କରିଛନ୍ତି। କଂଗ୍ରେସ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ଗୁଲାମନବୀ ଆଜାଦଙ୍କ ଆବେଦନର ଶୁଣାଣି ସମୟରେ ତାଙ୍କ ବରିଷ୍ଠ ଓକିଲ ଅଭିଷେକ ମନୁ ସିଂଘୱି ଦଲିଲ ଉପସ୍ଥାପନ କରିଥିଲେ। ଏହାପରେ ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ନୋଟିସ ଜାରି କରିବା ସହିତ ଗୁଲାମନବୀଙ୍କୁ କାଶ୍ମୀର ଯିବାକୁ ଅନୁମତି ଦେଇଛନ୍ତି। ସେ କେବଳ ୪ଟି ଜିଲାକୁ ଗସ୍ତ କରିପାରିବେ ବୋଲି କୋର୍ଟ ସର୍ତ୍ତ ରଖିଛନ୍ତି। ଏହି ଅବସରରେ ସେ କୌଣସି ରାଜନୈତିକ କାର୍ଯ୍ୟକ୍ରମରେ ଭାଗ ନେଇପାରିବ ନାହିଁ। ସେଠାକୁ ଯିବା ପରେ ସେ ସୁପ୍ରିମକୋର୍ଟଙ୍କୁ ଏକ ରିପୋର୍ଟ ପଠାଇବେ। କୋର୍ଟଙ୍କ ସର୍ତ୍ତ ଅନୁସାରେ ଗୁଲାମନବୀ ବାରାମୁଳା, ଅନନ୍ତନାଗ, ଶ୍ରୀନଗର ଏବଂ ଜାମ୍ମୁ ଜିଲା ଗସ୍ତ କରିପାରିବେ। ଗସ୍ତ ସମୟରେ ସେ କୌଣସି ରାଲି କରିବେ ନାହିଁ ବୋଲି ମଧ୍ୟ ଗୁଲାମନବୀଙ୍କ ପକ୍ଷରୁ କୋର୍ଟଙ୍କୁ ବିଶ୍ଵାସ ଦିଆଯାଇଥିଲା।
ସୂଚନାଯୋଗ୍ୟ, ଗୁଲାମନବୀ ଆଜାଦ ତାଙ୍କ ପରିବାର ଲୋକଙ୍କୁ ଭେଟିବାକୁ କାଶ୍ମୀର ଯାଉଥିବାବେଳେ ତାଙ୍କୁ ବିମାନବନ୍ଦରରୁ ଫେରାଇ ଦିଆଯାଇଥିଲା। ଏହା ପରେ ସେ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲେ।
