ସମ୍ବଲପୁର: ପ୍ରାୟ ୧୫୦ ବର୍ଷ ପୂର୍ବରୁ ପ୍ରତିଷ୍ଠିତ ଶ୍ରୀରାମପାଲି ଗ୍ରାମବାସୀ ମାନଙ୍କର ଦୁଃଖ ଦୁର୍ଦ୍ଦଶା କହିଲେ ନ ସରେ। ଦେଶ ସ୍ବାଧୀନ ହେବାର ୭୭ ବର୍ଷ ବିତି ଯାଇଥିଲେ ମଧ୍ୟ ସର୍ବନିମ୍ନ ସୁବିଧାରୁ ଏ ପର୍ଯ୍ୟନ୍ତ ବଞ୍ଚିତ ରହିଛନ୍ତି ବୋଲି ଶ୍ରୀରାମପାଲି ଗ୍ରାମବାସୀ ମାନେ ଗ୍ରାମସଭାରେ ନିଜର ଦୁଃଖ ଦୁର୍ଦ୍ଦଶା ଗ୍ରାମବାସୀ ମାନେ ବଖାଣିଛନ୍ତି।
ଶ୍ରୀରାମପାଲି ଗ୍ରାମବାସୀ ମାନଙ୍କ ପକ୍ଷରୁ ଶ୍ରୀ ହନୁମାନ ମନ୍ଦିର ପ୍ରାଙ୍ଗଣରେ ମେଘୁ ମୁଣ୍ଡାଙ୍କ ପରିଚାଳନାରେ ଅନୁଷ୍ଠିତ ସଭାରେ ମୁଖ୍ୟ ଅତିଥି ଭାବରେ ସମାଜସେବୀ କାର୍ତ୍ତିକ ପ୍ରସାଦ ବହିଦାର ମୁଖ୍ୟ ଅତିଥି ଏବଂ ବରିଷ୍ଠ ଚାଷୀ ନେତା ରାମସାଗର ସାହୁ ସମ୍ମାନୀତ ଅତିଥି ଭାବରେ ଯୋଗଦାନ କରିଥିଲେ। ଜମିପଟ୍ଟା ଅଭାବରୁ ଆବାସ ଯୋଜନା ଆଦି ବିଭିନ୍ନ ସରକାରୀ ସୁବିଧାରୁ ବଞ୍ଚିତ ଅନେକ ଗ୍ରାମବାସୀ ଭଙ୍ଗା ମାଟି କୁଡ଼ିଆରେ ବହୁ ଦୁଃଖ କଷ୍ଟରେ ଜୀବନଯାପନ କରୁଛନ୍ତି। ଘର ମାନଙ୍କରେ ଶୌଚାଳୟ ନ ଥିବାରୁ ଶୌଚ ପାଇଁ ଅନେକ ଦୂର ପଡ଼ିଆକୁ ଯିବାକୁ ପଡ଼ୁଛି। ପାନୀୟ ଜଳ ସମସ୍ୟା ଏବଂ ବିଜୁଳି ସମସ୍ୟା ଦୂରୀକରଣ ସହ ଗ୍ରାମରେ ଏକ ଆଙ୍ଗନବାଡ଼ି କେନ୍ଦ୍ର ଏବଂ ସୁଲଭ ଶୌଚାଳୟ ପ୍ରତିଷ୍ଠା ନିହାତି ଜରୁରୀ ବୋଲି ଗ୍ରାମବାସୀ ମାନେ ଦୃଢ଼ ଦାବୀ କରିଥିଲେ। ଭଗ୍ନ ଅବସ୍ଥାରେ ଥିବା ଶ୍ରୀ ହନୁମାନ ମନ୍ଦିରର ପୁନରୁଦ୍ଧାର ସମ୍ପର୍କରେ ଆଲୋଚନା କରାଯାଇଥିଲା। ଆଗାମୀ ଦିନରେ ଗ୍ରାମର ମହିଳା ମାନଙ୍କୁ ନେଇ ଏକ ମହିଳା ସମିତି ଗଠନ କରାଯିବ ବୋଲି ମଧ୍ୟ ପ୍ରସ୍ତାବ ଗ୍ରହଣ କରାଯାଇଥିଲା।
