ସମ୍ବଲପୁର : ସମ୍ବଲପୁରରେ କାଳବୈଶାଖି ଯୋଗୁଁ ଶନିବାର ଅପରାହ୍ନରେ ବର୍ଷା ହୋଇଥିଲା। ଗତକାଲି ସହରରେ ଅପରାହ୍ନ ପ୍ରାୟ ୫ଟାରୁ ସାମାନ୍ୟ ପବନ ସହିତ ବର୍ଷା ହୋଇଥିଲା। ବର୍ଷା ଆରମ୍ଭ ହେବା ମାତ୍ରେ ସାରା ସହରରେ ବିଦ୍ୟୁତ ସରବରାହକୁ ବନ୍ଦ କରି ଦିଆଯାଇଥିଲା। ଏହି କ୍ରମରେ ଧନୁପାଲି ଗ୍ରୀଡ ଅଞ୍ଚଳରୁ ବିଦ୍ୟୁତ ସରବରାହ ବିଚ୍ଛିନ୍ନ କରାଯାଇଥିବାରୁ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। ଏ ସର୍ମ୍ପକରେ ବିଦ୍ୟୁତ ଉପଖଣ୍ଡ କାର୍ଯ୍ୟାଳୟରେ ପଚରାଉଚୁରା କରାଯାଇଥିବା ବେଳେ କୌଣସି ସନ୍ତୋଷଜନକ ଉତ୍ତର ମିଳି ନ ଥିଲା। ପରବର୍ତ୍ତୀ ସମୟରେ ୨ ଘଣ୍ଟାରେ ବିଦ୍ୟୁତ ସରବରାହ ଆସିବାର କତ୍ତୃପକ୍ଷ କହିଥିବା ବେଳେ କିନ୍ତୁ ବିଦ୍ୟୁତ ଯିବାର ୫ ଘଣ୍ଟା ପରେ ଆସିଥିଲା। ଫଳରେ ରାତ୍ର ପ୍ରାୟ ୧୧ଟା ପର୍ଯ୍ୟନ୍ତ ଧନୁପାଲି, ଗୋବିନ୍ଦତୋଲା, ମାନେଶ୍ୱର, ଭତରା, ପୁଟିବନ୍ଧ, କୁଲୁଥକାନୀ, ଚାରଭାଟୀ, ସିନ୍ଦରୁପଙ୍କ, ଜିଲାସ୍କୁଲ, କଚେରୀ ଆଦି ବିଭିନ୍ନ ଅଞ୍ଚଳରେ ଏହି ବିରାଟ ଜନବସତି ଅଞ୍ଚଳ ଅନ୍ଧକାରରେ ବୁଡି ରହିଥିଲା। ପ୍ରବଳ ଗ୍ରୀଷ୍ମ ପ୍ରବାହ ସମୟରେ ନିରବଚ୍ଛିନ୍ନ ଭାବରେ ବିଦ୍ୟୁତ ଯୋଗାଣ ଉପରେ ଗୁରୁତ୍ୱ ଦେବାକୁ ମୁଖ୍ୟମନ୍ତ୍ରୀ ଆଦେଶ ଦେଇଥିବା ବେଳେ ଏହାକୁ ଖୋଲାଖୋଲି ଭାବରେ ଅବମାନା କରାଯାଇ ଘଣ୍ଟା ଘଣ୍ଟା ଧରି ବିଦ୍ୟୁତ ସରବରାହକୁ ବିଚ୍ଛିନ୍ନ କରାଯାଉଛି। ଏଣୁ ଲୋକେ ଅସହ୍ୟ ତାତିରେ ସିଝୁରବା ବେଳେ କେହି ଅସୁବିଧା ଶୁଣିବାକୁ ଇଚ୍ଛା ମଧ୍ୟ ନାହିଁ। ପୂର୍ବରୁ ଧନୁପାଲି ଗ୍ରୀଡରେ ଏକ ଯୋଗାଯୋଗ ନମ୍ବର ଥିବା ବେଳେ ତାହା ମଧ୍ୟ ଏବେ କାର୍ଯ୍ୟକ୍ଷମ ନୁହେଁ। ଏଣୁ ଜନତାଙ୍କ ସମସ୍ୟାକୁ ଧ୍ୟାନରେ ରଖି ସୁବ୍ୟବସ୍ଥା କରିବାକୁ ଧନୁପାଲି ନାଗରିକ ସମନ୍ୱୟ କମିଟି ତରଫରୁ ବିଜୁଳି ବିଭାଗକୁ ଚେତାବନୀ ଦିଆଯାଇଛି।
Comments are closed.