ସମ୍ବଲପୁର: ସମ୍ବଲପୁର ଗସ୍ତରେ ଆସିଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଗୁରୁବାର ବିଭିନ୍ନ ସ୍ଥାନରେ ଛଟ ପୁଜାରେ ସାମିଲ ହୋଇଛନ୍ତି। ଛଟ ପୁକାର ଶୁଭେଚ୍ଛା ଜଣାଇବା ସହିତ ସୁର୍ଯ୍ୟ ଦେବତାଙ୍କ ପୂଜା ଶ୍ରୀ ପ୍ରଧାନ କରିଛନ୍ତି। ଏହି ଅବସରରେ ଶ୍ରୀ ପ୍ରଧାନ କହିଛନ୍ତି ଯେ, ଜନତାଙ୍କର ଆସ୍ଥାର ପବିତ୍ର ପର୍ବ ହେଉଛି ଛଟ ପୂଜା। ଐତିହାସିକ ସମ୍ବଲପୁରର ବିଭିନ୍ନ ଅଞ୍ଚଳର ଛଟ ପୁଜାରେ ସାମିଲ ହେବା ମୋର ସୌଭାଗ୍ୟ ଅଟେ। ଏହି ପୂଜା ଆମର ଭାରତୀୟ ସଂସ୍କୃତିର ଅନନ୍ୟ ପରମ୍ପରା। ପ୍ରକୃତି ସଂରକ୍ଷଣ ଓ ସର୍ଯ୍ୟ ଉପାସନାର ମହାନ ପର୍ବକୁ ନାଗରିକ ମାନେ ଉତ୍ସାହର ସହିତ ପାଳନ କରନ୍ତି। ଆମର ପର୍ବ ଗୁଡିକ ପରିବେଶକୁ ସ୍ୱଚ୍ଛ ଓ ସୁନ୍ଦର କରିବାର ମହତ ବାର୍ତ୍ତା ଦେଉଛି।
ଏହି ବିଚାରରେ ଆମେ ସମସ୍ତେ ସରକାରୀ ବ୍ୟବସ୍ଥା ବ୍ୟତିତ ସମାଜର ସହଯୋଗରେ ସମ୍ବଲପୁରକୁ ସ୍ୱଚ୍ଛ ଓ ସୁନ୍ଦର କରିବା ପାଇଁ କାର୍ଯ୍ୟ କରିବା ଆବଶ୍ୟକ। ସମ୍ବଲପୁର ଅଞ୍ଚଳର ସଂସ୍କୃତି ଅନନ୍ୟ। ଏଠାରେ ତ୍ୟାଗ, ସଂଘର୍ଷ ଓ ଉତ୍କଣ୍ଠାର ମନୋବୃତ୍ତି ସାମାଜିକ ଜୀବନରେ ପ୍ରତିଫଳିତ ହୋଇଛି। ମାଁ ସମଲେଶ୍ୱରୀଙ୍କ ଭୂମି ସମ୍ବଲପୁରରେ ବିଭିନ୍ନ ଅଞ୍ଚଳର ଲୋକ ମାନେ ବସବାସ କରୁଥିବାରୁ ସମ୍ବଲପୁରର ବିଶେଷତା ରହିଛି। ସମାଜରେ ଭାଇଚାରା ବଢ଼ୁ, ଏହା ମହାପ୍ରଭୁ, ମାଁ ସମଲେଶ୍ୱରୀ, ଛଟି ମାଁ ଙ୍କ ପାଖରେ କାମନା କରୁଛି ବୋଲି ଏହି ଅବସରରେ କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି।
Comments are closed.