ସମ୍ବଲପୁର : ସମ୍ବଲପୁରର ଧନୁପାଲୀ ଥାନା କ୍ଷେତ୍ର ଅଞ୍ଚଳରେ ନାବାଳିକାକୁ ଜଣେ ନାବାଳକ ବଳାତ୍କାର କରିଥିବାର ଚାଞ୍ଚଲ୍ୟକର ଖବର ସମ୍ମୁଖକୁ ଆସିଛି।
ପ୍ରାପ୍ତସୂଚନାନୁଯାୟୀ, ସରଲାକାନୀର ମୁଣ୍ଡାପଡାର ଜଣେ ନାବାଳିକାଙ୍କୁ ତାଙ୍କର ପଡୋଶୀ ନାବାଳକ ବଳାତ୍କାର କରିଛି। ଦିନ ମଜୁରିଆ ଭାବରେ କାର୍ଯ୍ୟ କରୁଥିବା ନାବାଳିକାର ବାପାମାଆ କାମକୁ ଯାଇଥିବା ବେଳେ ସନ୍ଧ୍ୟା ସମୟରେ ଝିଅଟି ବାହାରେ ଖେଳୁଥିଲା। ଏହି ସମୟରେ ବଳାତ୍କାର କରିଥିବା ଅଭିଯୁକ୍ତ ନାବାଳକ ଜଣକ ପାଖରେ ଥିବା ତାର ମାମୁଁ ଘରକୁ ନାବାଳିକାକୁ ଡାକି ନେଇଥିଲା। ମାମୁଁର ଦେହ ଖରାପ ଥିବାରୁ ସମସ୍ତେ ଡାକ୍ତରଖାନା ଯାଇଥିବାରୁ ଘରଟି ଖାଲି ଥିବାର ସୁଯୋଗ ନେଇ ନାବାଳକ ଜଣକ ନାବାଳିକାର ପାଟିକୁ ବନ୍ଦ କରି ଜୋର ଜବରଦସ୍ତି ଦୁର୍ଷ୍କମ କରିଥିଲା। ନାବାଳକ ଜଣକ ଦୁର୍ଷ୍କମ କରିବା ସମୟରେ ନାବାଳିକାଟି ଜୋରରେ ପାଟି କରିବାରୁ ଘର ବାହାରେ ଥିବା ତାର ସାଙ୍ଗ ମାନେ ଘରର କବାଟ ଫାଙ୍କରେ ଘର ମଧ୍ୟକୁ ଦେଖିଥିଲେ। ନାବାଳିକାର ସାଙ୍ଗ ମାନେ କବାଟ ଫାଙ୍କ ମଧ୍ୟରେ ଦେଖି ଦୁର୍ଷ୍କମ ବିଷୟରେ ଜାଣିବାକୁ ପାଇଥିଲେ। ନାବାଳକ ଜଣକ ଦୁର୍ଷ୍କମ କରିବା ପରେ ନାବାଳିକାକୁ ୨୦ ଟଙ୍କା ଦେଇ ଚକଲେଟ ଖାଇବୁ ଏବଂ କାହାରିକୁ କିଛି କହିବୁ ନାହିଁ ବୋଲି କହି ଛାଡି ଦେଇଥିଲା। ତେବେ ନାବାଳିକା ଜଣକ ଟଙ୍କା ଧରି କାନ୍ଦି କାନ୍ଦି ଘରକୁ ଫେରିବା ପରେ ତାର ମାଆ ଓ ବାପାଙ୍କୁ ଘଟଣା ସର୍ମ୍ପକରେ କହିଥିଲେ। ଏହା ପରେ ନାବାଳିକାର ବାପା ମାଁ ଙ୍କୁ ଝିଅର ସାଙ୍ଗ ମାନେ ମଧ୍ୟ ଘଟଣା ସର୍ମ୍ପକରେ କହିଥିଲେ। ଏଣୁ ତାଙ୍କର ଲିଖିତ ଅଭିଯୋଗରେ ଧନୁପାଲୀ ଥାନାରେ ନାବାଳିକାଙ୍କୁ ବଳାତ୍କାର ଓ ପୋକସୋ ଆକ୍ସ ଅନୁଯାୟୀ ମାମଲା ନଂ ୫୫/୨୦୨୦ ରୁଜୁ କରାଯାଇ ଅଭିଯୁକ୍ତ ନାବାଳକକୁ ପୁଲିସ ଧରିଥିଲା। ଉଭୟ ନାବାଳକ ଓ ନାବାଳିକାର ଡାକ୍ତରୀ ମାଇନା କରାଯାଇଛି। ଆଇନ ଅନୁଯାୟୀ ପ୍ରକ୍ରିୟା ପୂରଣ ପରେ ନାବାଳକକୁ ରାଉରକେଲା ସ୍ଥିତ ବାଳ ସୁଧାର ଗୃହକୁ ପଠାଯାଇଛି ବୋଲି ଧନୁପାଲୀ ପୁଲିସ କହିଛି।
