ସମ୍ବଲପୁର : ଗତ ୯ ତାରିଖରେ କୁଚିଣ୍ଡା ଥାନା ଅନ୍ତର୍ଗତ ଲଇମୁରା ନିକଟସ୍ଥ ଠୁଟିପିପଲ ଜଙ୍ଗଲ ନିକଟରୁ ବନ୍ଧୁକ ମୁନରେ ୩୫ ଲକ୍ଷ ୪୧ ହଜାର ଟଙ୍କା ଲୁଟ୍ ହୋଇଥିଲା ।
ସୋମବାର ଅପରାହ୍ନରେ ସମ୍ବଲପୁରରୁ ଲଇମୁରା ୟୁନିଅନ ବ୍ୟାଙ୍କକୁ ଯାଉଥିବା ଭ୍ୟାନକୁ ୬ ଡକାୟତ ଲୁଟିଥିଲେ । ଭ୍ୟାନରେ ଥିବା ବ୍ୟାଙ୍କ କର୍ମଚାରୀ ଓ ସୁରକ୍ଷା କର୍ମଚାରୀ ବନ୍ଧୁକ ଦେଖାଇ ଭୟଭୀତ କରିବା ସହ ବ୍ୟାଙ୍କକୁ ଯାଉଥିବା ୩୫ ଲକ୍ଷ ୪୧ ହଜାର ଟଙ୍କା ଲୁଟି ନେଇଥିଲେ । ୬ ଡକାୟତ ତିନିଟି ବାଇକରେ ଆସି ନିଛାଟିଆ ଜଙ୍ଗଲିଆ ରାସ୍ତାରେ ପ୍ରଥମେ ଗାଡିକୁ ଅଟକାଇବା ସହ ସମସ୍ତଙ୍କୁ ବନ୍ଧୁକ ଦେଖାଇ ଭୟଭୀତ କରିଥିଲେ ଓ ଏହାପରେ ଗାଡିରେ ଥିବା ସବୁ ଟଙ୍କା ଲୁଟି ଫେରାର ହୋଇଯାଇଥିଲେ । ଏହି ଘଟଣାରେ ଜିଲା ପୁଲିସ ୪ ଟି ସ୍କ୍ୱାର୍ଡ ଗଠନ କରି ବିଭିନ୍ନ ସ୍ଥାନରେ ଚଢ଼ାଉ କରିଥିଲେ । ଏହି ଲୁଟ୍ ଘଟଣାରେ ମୋଟ ୧୧ ଜଣଙ୍କ ସମ୍ପୃକ୍ତି ରହିଥିବା ପୁଲିସ କହିଛି । ମୋଟ ୯ ଜଣଙ୍କୁ ଗିରଫ କରାଯିବା ସହ ସେମାନଙ୍କ ନିକଟରୁ ଗୋଟିଏ କାର, ମୋଟରସାଇକେଲ , ୮ ଟି ମୋବାଇଲ, ଭୁଜାଲି ଓ ନଗଦ ୧୦ ଲକ୍ଷ ଟଙ୍କା ପୁଲିସ ଜବତ କରିଛି। ଏହି ଘଟଣାର ମାଷ୍ଟର ମାଇଣ୍ଡକୁ ମଧ୍ୟ ପୁଲିସ ଗିରଫ କରିଛି । ଆଉ ଦୁଇଜଣ ଏବେ ବି ଫେରାର ରହିଛନ୍ତି । ଗିରଫମାନଙ୍କ ମଧ୍ୟରେ ଜଣେ ନାବାଳକ ରହିଥିବା ପୁଲିସ ସୂଚନା ଦେଇଛି। ଆଜି ସମସ୍ତ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯିବ। ପରେ ଅଭିଯୁକ୍ତମାନଙ୍କୁ ରିମାଣ୍ଡରେ ଅଣାଯିବ ବୋଲି ସମ୍ବଲପୁରରେ ଆୟୋଜିତ ସାମ୍ବାଦିକ ସମ୍ମିଳନୀରେ ଏସପି ଡ଼. କନୱର ବିଶାଳ ସିଂ ସୂଚନା ଦେଇଛନ୍ତି ।
