ପାଳଲହଡା : ପାଳଲହଡା ଥାନା ଶିଗଡ ପଞ୍ଚାୟତ ଅନ୍ତର୍ଗତ ନନ୍ଦିନୀପାଲି ଗାଁରେ ଜଣେ ମହିଳାଙ୍କୁ ବଳାତ୍କାର ପରେ ହତ୍ୟା କରାଯିବା ଘଟଣା ସମଗ୍ର ରାଜ୍ୟରେ ଚାଞ୍ଚଲ୍ୟ ଖେଳାଇ ଦେଇଛି। ଆଜି ‘ସମାଜ’ ରିଲିଫ କମିଟିର ଅଧ୍ୟକ୍ଷ ତଥା ‘ସମାଜ’ର ପ୍ରକାଶକ ଓ ମୁଦ୍ରାକର ଡ.ପ୍ରଭାସଚନ୍ଦ୍ର ଆଚାର୍ଯ୍ୟ ‘ସମାଜ’ର ଏକ ଟିମ ନେଇ ଅନୁଗୋଳ ଜିଲା ପାଳଲହଡା ଥାନା ଅନ୍ତର୍ଗତ ନନ୍ଦିନୀପାଲି ଗାଁରେ ପହଞ୍ଚି ଥିଲେ। ମୃତ ରମ୍ଭା ନାୟକଙ୍କ ପରିବାର ଲୋକଙ୍କୁ ଭେଟି ଗଭୀର ସମବେଦନା ଜଣାଇବା ସହ ଏହି ହତ୍ୟା ମାମଲାର ତଦନ୍ତକାରୀ ଅଧିକାରୀ ପାଳଲହଡା ଉପଖଣ୍ଡ ଆରକ୍ଷୀ ଅଧିକାରୀ କୈଳାସଚନ୍ଦ୍ର ସେଠୀ, ଥାନା ଅଧିକାରୀ ପ୍ରଦୀପ କୁମାର ମହାନ୍ତଙ୍କ ସହ ତଦନ୍ତ ସମ୍ପର୍କରେ ବିସ୍ତୃତ ଆଲୋଚନା କରିଥିଲେ। ଶବ ବ୍ୟବଚ୍ଛେଦ ସମୟରେ ପାଳଲହଡା ଡାକ୍ତରଖାନାରେ ଡ. ଆଚାର୍ଯ୍ୟ ଉପସ୍ଥିତ ରହି ଡାକ୍ତରୀ ଦଳଙ୍କ ସହ ଆଲୋଚନା କରିଥିଲେ। ବଳାତ୍କାର ଓ ବୀଭତ୍ସ ହତ୍ୟାର ଶିକାର ହୋଇଥିବା ୩୨ ବର୍ଷୀୟ ମହିଳା ରମ୍ଭା ନାୟକଙ୍କ ସ୍ବାମୀ ଅଜୁ ନାୟକଙ୍କୁ ‘ସମାଜ’ ରିଲିଫ ପାଣ୍ଠିରୁ ୧୦ ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରାଯାଇଥିଲା। ସମବେଦନା ଓ ଆର୍ଥିକ ସହାୟତା ପ୍ରଦାନ ସମୟରେ ‘ସମାଜ’ ର ସମ୍ପାଦକ ତଥା କାର୍ଯ୍ୟକାରୀ ମୁଖ୍ୟ ପରିଚାଳକ ତପନ କୁମାର ମିଶ୍ର, ପାଳଲହଡା ଖବରଦାତା ରବି ନାରାୟଣ ପ୍ରଧାନ ପ୍ରମୁଖ ଉପସ୍ଥିତ ଥିଲେ।
Comments are closed.