ନୂଆଦିଲ୍ଲୀ: କଂଗ୍ରେସ ନେତା ସାମ୍ ପିଟ୍ରୋଡା ବିବାଦ ଘେରକୁ ଆସିଛନ୍ତି। ଏଥର ସେ ଦକ୍ଷିଣ ଭାରତୀୟଙ୍କୁ ଆଫ୍ରିକୀୟଙ୍କ ସହିତ ତୁଳନା କରି ସମାଲୋଚନାର ଶିକାର ହୋଇଛନ୍ତି। ଭାରତର ବିଭିନ୍ନ ଅଞ୍ଚଳରେ ବସବାସ କରୁଥିବା ଲୋକଙ୍କୁ ସେ ଚାଇନିଜ୍, ଆରବ, ଶ୍ଵେତ ଏବଂ ଆଫ୍ରିକୀୟଙ୍କ ସହିତ ତୁଳନା କରିଛନ୍ତି। ଭାରତରେ ବିବିଧତା ଏବଂ ଗଣତନ୍ତ୍ର ବିଷୟରେ ସାକ୍ଷାତକାର ଦେବା ସମୟରେ ସେ ଏଭଳି କହିଛନ୍ତି।
ଇଣ୍ଡିଆନ ଓଭରସିଜ୍ କଂଗ୍ରେସ ସଭାପତି ପିଟ୍ରୋଡା କହିଥିଲେ, ଆମେ ବିଶ୍ଵରେ ଗଣତନ୍ତ୍ରର ଏକ ଜ୍ଵଳନ୍ତ ଉଦାହରଣ। ଭାରତର ପୂର୍ବାଞ୍ଚଳର ଲୋକମାନେ ଚାଇନିଜଙ୍କ ପରି ଦେଖାଯାଆନ୍ତି। ପଶ୍ଚିମରେ ବସବାସ କରୁଥିବା ଲୋକ ଆରବବାସୀଙ୍କ ପରି ଦେଖାଯାଆନ୍ତି। ସେହିପରି ଉତ୍ତରରେ ରହୁଥିବା ଲୋକେ ଗୋରା ଏବଂ ଦକ୍ଷିଣରେ ରହୁଥିବା ଲୋକ ଆଫ୍ରିକୀୟଙ୍କ ପରି ଦେଖାଯାଆନ୍ତି ବୋଲି ସେ କହିଥିଲେ।
ପିଟ୍ରୋଡାଙ୍କ ଏପରି ଜାତିଗତ ଆକ୍ଷେପକୁ ନେଇ ପ୍ରତିକ୍ରିୟା ପ୍ରକାଶ କରିଛନ୍ତି ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ଵଶର୍ମା। ସେ କହିଛନ୍ତି, ‘‘ମୁଁ ଭାରତର ଉତ୍ତରାଞ୍ଚଳର ବାସିନ୍ଦା, କିନ୍ତୁ ମୁଁ ଜଣେ ଭାରତୀୟ ପରି ଦିଶେ। ଆମେ ଦେଖିବାକୁ ଭିନ୍ନ ହୋଇଥାଉ, କିନ୍ତୁ ସମସ୍ତେ ଏକ। ଆମ ଦେଶ ବିଷୟରେ କିଛି ତ ଶିଖନ୍ତୁ’’ ବୋଲି ବିଶ୍ଵଶର୍ମା ପିଟ୍ରୋଡାଙ୍କ ଉଦ୍ଦେଶ୍ୟରେ କହିଛନ୍ତି।
ସେହିପରି ବିଜେପିର ଲୋକସଭା ପ୍ରାର୍ଥୀ କଙ୍ଗନା ରଣାୱତ ମଧ୍ୟ ପିଟ୍ରୋଡାଙ୍କ ମନ୍ତବ୍ୟକୁ ସମାଲୋଚନା କରିଛନ୍ତି। ବିଜେପି ନେତା ରବିଶଙ୍କର ପ୍ରସାଦ ମଧ୍ୟ ପିଟ୍ରୋଡାଙ୍କୁ ସମାଲୋଚନା କରିବା ସହିତ ସେ ଆମ ଦେଶକୁ ଏଯାଏ ବୁଝିନାହାନ୍ତି ବୋଲି କହିଛନ୍ତି। ସୂଚନାଯୋଗ୍ୟ, ପିଟ୍ରୋଡା ହେଉଛନ୍ତି କଂଗ୍ରେସ ନେତା ରାହୁଲ ଗାନ୍ଧୀଙ୍କ ମେଣ୍ଟର।
