ମୁମ୍ବଇ: ନିଜକୁ ଭିଆଇପି ମନେକରି ବିମାନ ବନ୍ଦର ନିୟମ ନମାନି ତନଖି ଫାଟକ ଅତିକ୍ରମ କରୁଥିବା ସମୟରେ ୨୧ ତାରିଖରେ ବଲିଉଡର ଖ୍ୟାତନାମା ଅଭିନେତା ସଲମାନ୍ ଖାଁଙ୍କୁ ଅଟକାଇ ଥିଲେ ଶିଳ୍ପ ନିରାପତ୍ତା ବାହିନୀ (ସିଆଇଏସଏଫ)ର ଓଡ଼ିଆ ଯବାନ ସୋମନାଥ ମହାନ୍ତି। ଚାକିରି ନିୟମାବଳୀର ଉଲ୍ଲଙ୍ଘନ କରି ଗଣମାଧ୍ୟମ ସମ୍ମୁଖରେ ନିଜ ମତାମତ ଦେଇଥିବାରୁ ସୋମନାଥଙ୍କଠାରୁ ସିଆଇଏସଏଫ ଜବାବ ତଲବ କରିଛି।
ଗତ ଶନିବାର ଭୋର ପ୍ରାୟ ୪ଟାରେ ସଲମାନ୍, ଅଭିନେତ୍ରୀ କ୍ୟାଟ୍ରିନା କୈଫ ଓ ଇମ୍ରାନ ହାସ୍ମି ମୁମ୍ବଇ ବିମାନ ବନ୍ଦରରେ ପହଞ୍ଚିଥିଲେ। ଆଗାମୀ ହିନ୍ଦୀ ସିନେମା ‘ଟାଇଗର-୩’ ସୁଟିଂ ପାଇଁ ଏମାନେ ବ୍ୟକ୍ତିଗତ ବିମାନରେ ରୁଷ୍ ଯାଉଥିଲେ। ତେଣୁ ଏମାନଙ୍କର କେବଳ ‘ଭିସା’ ଓ ପାସପୋର୍ଟ ତନଖି ହେବା କଥା। ବିମାନ ବନ୍ଦରର ତନଖି ଫାଟକଠାରେ ନିୟୋଜିତ ଥିବା ସୋମନାଥ ସଲମାନଙ୍କୁ ଅଟକାଇ ସାଧାରଣ ଯାତ୍ରୀଙ୍କ ସହ ଧାଡ଼ିରେ ଆସିବାକୁ କହିଥିଲେ। ସଲମାନ୍ ଯବାନଙ୍କ ନିର୍ଦେଶକୁ ସମ୍ମାନ ଜଣାଇ ପଛକୁ ଫେରି ଯାତ୍ରୀଙ୍କ ଧାଡ଼ିରେ ଆସି ତନଖି ପରେ ବିମାନ ଅଭିମୁଖେ ଯାତ୍ରା କରିଥିଲେ। ସେ ବିମାନ ବନ୍ଦର ତନଖି ଫାଟକ ନିକଟରେ ଥିବାବେଳେ କେତେଜଣ ଫଟୋଗ୍ରାଫର ଓ ପ୍ରଶଂସକ ଭିଡ଼ ଜମାଇଥିଲେ। ନିରାପତ୍ତା ଦୃଷ୍ଟିରୁ ସୋମନାଥ ସେମାନଙ୍କୁ ମଧ୍ୟ ଘଉଡ଼ାଇ ଦେଇଥିଲେ। ପରେ ସଲମାନ୍ ଓ ତାଙ୍କ ଦଳ ନିଜ ବ୍ୟକ୍ତିଗତ ବିମାନରେ ରୁଷ୍ ଯାତ୍ରା କରିଥିଲେ। ନିୟମ ସମସ୍ତଙ୍କ ପାଇଁ ସମାନ ବୋଲି ସେଠାରେ ଉପସ୍ଥିତ ଥିବା ଗଣମାଧ୍ୟମ ପ୍ରତିନିଧିମାନଙ୍କୁ ସୋମନାଥ କହିଥିଲେ। ଏ ସଂକ୍ରାନ୍ତରେ ଏକ ଭିଡିଓ ବ୍ୟାପିବା ପରେ ସମଗ୍ର ଦେଶରେ ସୋମନାଥଙ୍କ କର୍ତ୍ତବ୍ୟପରାୟଣ ଓ ଦାୟିତ୍ବବୋଧତାକୁ ପ୍ରଶଂସା କରାଯାଇଥିଲା। ସୋମନାଥଙ୍କ ଘର ନୟାଗଡ଼ ଜିଲାରେ ବୋଲି ଜଣାପଡ଼ିଛି। ତେବେ ସେନା ପୋଷାକରେ ଥାଇ ସର୍ବସାଧାରଣରେ ନିଜ ମତାମତ ଉପସ୍ଥାପନ କରିବା ଚାକିରି ନିୟମର ଉଲ୍ଲଙ୍ଘନ। ଏଥିପାଇଁ ସିଆଇଏସଏଫ ପକ୍ଷରୁ ଜବାବ ତଲବ କରାଯାଇଥିବା ଜଣାପଡ଼ିଛି।
