ଧାମରା: ଭଦ୍ରକ ଜିଲା ଚାନ୍ଦବାଲି ବ୍ଲକ ଅର୍ନ୍ତଗତ କରଣପଲ୍ଲୀ ରୁଗା ଛକ ଠାରେ ମଇଁଷି ଧାନ ଖାଇବାକୁ ନେଇ ୨ ଗୋଷ୍ଠୀଙ୍କ ମଧ୍ୟରେ ଗଣ୍ଡଗୋଳ ହୋଇଥିବା ଜଣାଯାଇଛି। ଏହି ଗଣ୍ଡଗୋଳକୁ ଆଧାର କରି ମଇଁଷିଆଳ ହରିଆ ମହାକୁଡଙ୍କ ଆକ୍ରମଣରେ ଶିକାର ହୋଇ କଟକ ବଡ ଡାକ୍ତରଖାନାରେ ଚିକିତ୍ସିତ ହେଉଥିବା ଆଲୋକ ଗିରିଙ୍କ ପରିବାର ଏବଂ ସ୍ଥାନୀୟ ଗ୍ରାମବାସୀ ଧାମରା-ବାସୁଦେବପୁର ରାସ୍ତା ଅବରୋଧ କରିଛନ୍ତି। ଆଜି ସକାଳ ସମୟରେ ହରିଆ ମହାକୁଡଙ୍କ ମଇଁଷି ଆଲୋକ ଗିରିଙ୍କ ଧାନ କିଆରିରେ ପଶି ଧାନ ଖାଉଥିବା ବେଳେ ଆଲୋକ ଗିରି ଏବଂ ହରିଆ ମହାକୁଡଙ୍କ ମଧ୍ୟରେ ଉଚ୍ଚବାଚ୍ୟ ହୋଇଥିଲା। ପରେ ଉତ୍ୟକ୍ତ ହରିଆ ଏକ ବାଡିରେ ଆଲୋକ ଗିରିକୁ ମରଣାତ୍ମକ ଆକ୍ରମଣ କରିଥିଲା। ଏହି ଆକ୍ରମଣରେ ଆଲୋକଙ୍କ ମୁଣ୍ଡ ଫାଟି ଯାଇଥିବା ବେଳେ ତାଙ୍କୁ କଟକ ମେଡିକାଲକୁ ସ୍ଥାନାନ୍ତରିତ କରାଯାଇଛି। ଏହାର ପ୍ରତିବାଦରେ ସ୍ଥାନୀୟ ଗ୍ରାମବାସୀ ଟାୟାର ଜାଳି ଦୀର୍ଘ ୪ ଘଣ୍ଟା ଧରି ଧାମରା-ବାସୁଦେବପୁର ରାସ୍ତା ଅବରୋଧ କରିଥିଲେ। ଫଳରେ ଧାମରା ବନ୍ଦର ଏବଂ ଧାମରା ପ୍ରତିରକ୍ଷା ଘାଟିକୁ ଯାଉଥିବା ସମସ୍ତ ଗାଡି ରୁଗା ଛକ ଠାରେ ବନ୍ଦ ହୋଇ ରହିଥିଲା। ପରେ ବାଂଶଡା ଥାନାଧିକାରୀ କରୁଣାକର ରାଉତ ଯାଇ ଖୁବଶୀଘ୍ର ମାଡ ମାରିଥିବା ଆସାମୀକୁ ଗିରଫ କରାଯିବ ବୋଲି ପ୍ରତିଶ୍ରୁତି ଦେବା ପରେ ଏହି ରାସ୍ତାରୋକ ହଟିଥିଲା।
Comments are closed.