ରେଙ୍ଗାଲିକେମ୍ପ: ଅତାବିରା ବ୍ଲକ ବୁଗୁବୁଗା ଟିକ୍ରା ପଡ଼ାର ଭାଗ ଚାଷୀଙ୍କ ଚାରି ଏକର ଧାନ ଖରି ଜଳିଯିବା ପରେ ସେ ଆତ୍ୟନ୍ତହତାଶ ହୋଇ ପଡିଛନ୍ତି। ଚାଷ ପାଇଁ କରିଥିବା ଋଣ ପରିଶୋଧ ସହ ଜମି ମାଲିକକୁ କର ଧାନ ଦେବା ଆଜି ତାଙ୍କ ପାଇଁ ଦୁଃସହ ହୋଇ ପଡ଼ିଛି। ଏହି ଅଭାବନୀୟ ଘଟଣା ଭାଗ ଚାଷୀଙ୍କ ପାଇଁ ଆଜି ଦୁର୍ଭାଗ୍ୟ ସାଜିଛି। ତାଙ୍କର ଏହି ପ୍ରତିକୂଳ ପରିସ୍ଥିତି ସମୟରେ ତାଙ୍କର ଦୁଃଖର ସାଥୀ ହୋଇ ତାଙ୍କ ପରିବାରକୁ ସ୍ଵାନ୍ତନା ଦେବା ପାଇଁ ତଥା ତାଙ୍କର କ୍ଷତିପୂରଣ ଦାବି ପାଇଁ ଆଜି ଓଡିଶା ରାଜ୍ୟ କୃଷକ ସଙ୍ଗଠନର ରାଜ୍ୟ ସଭାପତି ସଡାନନ ଭୋଇଙ୍କ ନିର୍ଦ୍ଦେଶ କ୍ରମେ ଓଡ଼ିଶା ରାଜ୍ୟ କୃଷକ ସଙ୍ଗଠନ ଅତାବିରା ଶାଖା ପହଞ୍ଚିଥିଲା।
ଜଳି ଯାଇଥିବା ଧାନ ଖରିକୁ ପରିଦର୍ଶନ କରି ସାରିବା ଅତାବିରା କୃଷି ଅଧିକାରୀ ବିଜୟ ପଟ୍ଟନାଏକଙ୍କ ସହ ବିସ୍ତୃତ ଆଲୋଚନା କରିବା ପରେ, ଜଳିଥିବା ଧାନ ଖରିର କ୍ଷତି ପୂରଣ ମିଳିପାରିବ ନାହିଁ ବୋଲି ମନାକରି ଦେଇଥିଲେ। ଯଦି ଧାନ ବିଲରେ ପେଟା ଥାଇ ପୋଡ଼ିଥନ୍ତା ତା ହେଲେ ବୀମା କ୍ଷତି ପୂରଣ ମିଳିପାରି ଥାନ୍ତା ବୋଲି ଅଧିକାରୀ ଦର୍ଶାଇଥିଲେ। ଏହାପରେ ସେମାନେ ତହସିଲଦାର ସୌଭାଗ୍ୟ ବେହେରାଙ୍କୁ ଭେଟି ଥିଲେ।ଭାଗ ଚାଷୀ ଜଣକ ଅତି ଆକୁଳ ହୋଇ ତାଙ୍କ ଦୁର୍ଭାଗ୍ୟର କଥା ଜଣାଇଥିଲେ ଓ କିଛି କ୍ଷତି ପୁରଣ ପାଇବା ପାଇଁ ଅନୁରୋଧ କରିଥିଲେ। କିନ୍ତୁ ତହସିଲଦାର ମଧ୍ୟ କ୍ଷତିପୂରଣ ମିଳିପାରିବ ନlହିଁ ବୋଲି ରୋକ୍ ଠୋକ ମନା କରିଦେଇଥିଲେ। ତେଣୁ କୌଣସି ଉପାୟ ନ ପାଇ ଆସନ୍ତା ସୋମବାର ଦିନ କ୍ଷତିଗ୍ରସ୍ତ ଚାଷୀ ଓ ସଂଘ ଜିଲ୍ଲାପାଳଙ୍କ ଦ୍ବାରସ୍ଥ ହେବେ ବୋଲି ସଂଘର ବରିଷ୍ଠ ଚାଷୀ ନେତା ବସନ୍ତ ବାରିକ୍ ଓ ପଲଉ ମାଝୀ ପ୍ରକାଶ କରିଥିବା ଜଣାପଡିଛି।
Comments are closed.