ମୁମ୍ବଇ: ଭାରତୀୟ ରିଜର୍ଭ ବ୍ୟାଙ୍କ(ଆରବିଆଇ) ଆଜି ସୁଧ ହାରରେ ୦.୨୫% ବୃଦ୍ଧି କରିଛନ୍ତି। ଆରବିଆଇ ଗଭର୍ଣ୍ଣର ଉର୍ଜିତ ପଟେଲ୍ଙ୍କ ଅଧ୍ୟକ୍ଷତାରେ ଅନୁଷ୍ଠିତ ମୁଦ୍ରାନୀତି କମିଟି ବୈଠକରେ ସୁଧ ହାର ବୃଦ୍ଧି ସମ୍ପର୍କରେ ଘୋଷଣା କରାଯାଇଛି। କ୍ରମବର୍ଦ୍ଧିଷ୍ଣୁ ମୁଦ୍ରାସ୍ଫୀତି ହାରକୁ ଦୃଷ୍ଟିରେ ରଖି ସୁଧ ହାର ବୃଦ୍ଧି କରାଯାଇଥିବା କୁହାଯାଇଛି। ୨୦୧୩ ଅକ୍ଟୋବର ପରେ ଚଳିତ ଆର୍ଥିକ ବର୍ଷରେ ଲଗାତାର ଦ୍ୱିତୀୟ ଥର ପାଇଁ ସୁଧ ହାର ବୃଦ୍ଧି କରାଯାଇଛି। ଗତ ମୁଦ୍ରାନୀତି ସମୀକ୍ଷା ବୈଠକରେ ସୁଧ ହାରରେ ୦.୨୫% ବୃଦ୍ଧି ଘଟିଥିଲା।
ସୁଧ ହାର ବୃଦ୍ଧି ପରେ ଆରବିଆଇର ରିପୋ ରେଟ୍(ଯେଉଁ ହାରରେ ଆରବିଆଇ ବାଣିଜ୍ୟିକ ବ୍ୟାଙ୍କଗୁଡ଼ିକୁ ଋଣ ଦିଏ) ୬.୫୦% କୁ ବୃଦ୍ଧି ପାଇଥିବା ବେଳେ ରିଭର୍ସ ରିପୋ(ଯେଉଁ ହାରରେ ଆରବିଆଇ ବାଣିଜ୍ୟିକ ବ୍ୟାଙ୍କଠାରୁ ଋଣ ନିଏ) ୬.୨୫%କୁ ବୃଦ୍ଧି ପାଇଛି।
ଏହି ସୁଧ ହାର ବୃଦ୍ଧିର ପ୍ରଭାବରେ ଗୃହ ଓ ଗାଡ଼ି ଋଣ ମହଙ୍ଗା ହେବ ବୋଲି ବିଶେଷଜ୍ଞମାନେ କହିଛନ୍ତି। ସୁଧ ହାର ବୃଦ୍ଧି ସମ୍ପର୍କରେ କୌଣସି ବ୍ୟାଙ୍କ ଏ ପର୍ଯ୍ୟନ୍ତ ଘୋଷଣା କରି ନଥିଲେ ହେଁ ପରବର୍ତ୍ତୀ ସମୟରେ ପରିଚାଳନା ମଣ୍ଡଳି ନିଷ୍ପତ୍ତି ଅନୁଯାୟୀ ବ୍ୟାଙ୍କଗୁଡ଼ିକ ସୁଧ ହାର ସମ୍ପର୍କରେ ଘୋଷଣା କରିପାରନ୍ତି।
ମୁଦ୍ରାନୀତି ସମୀକ୍ଷା ଅବସରରେ ଆରବିଆଇ ପକ୍ଷରୁ ଚଳିତ ଆର୍ଥିକ ବର୍ଷର ଅଭିବୃଦ୍ଧି ସମ୍ପର୍କରେ ସୂଚନା ଦିଆଯାଇଛି। ଆର୍ଥିକ ବର୍ଷର ପ୍ରଥମ ଛଅ ମାସ ପାଇଁ ଅଭିବୃଦ୍ଧି ହାର ୭.୪% ଓ ପରବର୍ତ୍ତୀ ଛଅ ମାସ ପାଇଁ ୭.୫ରୁ ୭.୬% ରହିବ ବୋଲି ଆରବିଆଇ ପକ୍ଷରୁ ଆକଳନ କରାଯାଇଛି।
