ନୂଆଦିଲ୍ଲୀ : ଅଯୋଧ୍ୟାରେ ନବନିର୍ମିତ ରାମ ମନ୍ଦିରରେ ଶ୍ରଦ୍ଧାଳୁଙ୍କ ଭିଡ ଲାଗିରହୁଛି । ଭକ୍ତମାନେ ନିଜ ରାମଲାଲାଙ୍କୁ ଦେଖିବା ପାଇଁ କାହିଁ କେଉଁ ଦୂରରୁ ଛୁଟି ଆସୁଛନ୍ତି । ଏହା ସହିତ ମନ୍ଦିରର ପ୍ରସାଦ, ସରଜୁ ନଦୀର ଜଳ ଭଳି ଖାସ୍ ଜିନିଷର ମଧ୍ୟ ଚାହିଦା ଲଗାତର ବଢିବାରେ ଲାଗିଛି । ଯେଉଁମାନେ ଅଯୋଧ୍ୟା ଯାଇପାରୁନାହାଁନ୍ତି ସେମାନେ ଘରେ ବସି ଅନଲାଇନରେ ମନ୍ଦିରର ପ୍ରସାଦ ମଗାଉଛନ୍ତି । ଏବେ ଲୋକମାନେ ରାମଲଲା ଏବଂ ରାମ ମନ୍ଦିର ହୋଇଥିବା ରୂପା ମୁଦ୍ରା ମଧ୍ୟ କିଣିପାରିବେ । ଅର୍ଥ ମନ୍ତ୍ରୀ ନିର୍ମଳା ସୀତାରମଣ ୩ ସ୍ମାରକ ମୁଦ୍ରା ଜାରି କରିଛନ୍ତି । ଏଥିରେ ଗୋଟିଏ ମୁଦ୍ରାରେ ରାମଲଲା ଏବଂ ରାମ ଜନ୍ମଭୂମି ମନ୍ଦିର, ଅଯୋଧ୍ୟାର ଥିମ୍ ଉପରେ ଆଧାରିତ । ଏହି ମୁଦ୍ରାକୁ ସରକାରଙ୍କ ଅଫିସିଆଲ୍ ସାଇଟରୁ ମଧ୍ୟ ଲୋକେ କିଣିପାରିବେ ।
ରାମଲାଲା ଏବଂ ରାମ ମନ୍ଦିର ଥିମ୍ ବିଶିଷ୍ଟ ୫୦ ଗ୍ରାମ ଓଜନର ଏହି ମୁଦ୍ରା ୯୯୯ ଶୁଦ୍ଧ ରୂପାରେ ପ୍ରସ୍ତୁତ ହୋଇଛି । ଏହି ମୁଦ୍ରାର ଗୋଟିଏ ପଟେ ଅଯୋଧ୍ୟାରେ ନିର୍ମିତ ରାମ ମନ୍ଦିରର ଫଟୋ ଓ ଅନ୍ୟପଟେ ମନ୍ଦିରର ଗର୍ଭଗୃହରେ ବିରାଜମାନ ରାମଲାଲାଙ୍କ ଫଟୋ ରହିଛି । ଏହା ବ୍ୟତୀତ ଅନ୍ୟ ୨ ସ୍ମାରକ ମୁଦ୍ରା ମଧ୍ୟ ଜାରି କରାଯାଇଛି । ଏହି ସ୍ମାରକ ମୁଦ୍ରା ୫୦ ଗ୍ରାମ ଓଜନ ବିଶିଷ୍ଟ ଏବଂ ଶୁଦ୍ଧ ରୂପାରେ ପ୍ରସ୍ତୁତ । ଏହାର ଦାମ୍ ୫ ହଜାର ଟଙ୍କାରୁ ଅଧିକ । ଏହି ମୁଦ୍ରାକୁ କ୍ରୟ କରି ନିଜ ଘର ମନ୍ଦିରରେ ଲୋକେ ଏହାକୁ ରଖିପାରିବେ । ଏହା ବ୍ୟତୀତ ଏହି ମୁଦ୍ରା ନିଜ ଆତ୍ମୀୟଙ୍କୁ ଉପହାର ସ୍ବରୂପ ମଧ୍ୟ ଦେଇପାରିବେ । ଏହି ମୁଦ୍ରାକୁ କ୍ରୟ କରିବା ପାଇଁ ଆପଣଙ୍କୁ ସରକାରଙ୍କ ଅଫିସିଆଲ ଓ୍ବେବସାଇଟ୍ https://www.indiagovtmint.in/souvenir-coins/ କୁ ଯିବାକୁ ହେବ । ଏଥିରେ ଜଣାଯାଇଥିବା ପ୍ରକ୍ରିୟାକୁ ପୁରା କରି ଆପଣ ଏହି ସ୍ମାରକ ମୁଦ୍ରା କ୍ରୟ କରିପାରିବେ ।
