ମନ୍ତ୍ରୀପଦ ଛାଡିବାକୁ ରାଜଭରଙ୍କ ଘୋଷଣା

ଲକ୍ଷ୍ନୌ : ଯୋଗୀ ଆଦିତ୍ୟନାଥଙ୍କ ନେତୃତ୍ବ ଉତ୍ତରପ୍ରଦେଶ ବିଜେପି ସରକାରର ମେଣ୍ଟ ସହଯୋଗୀ ଦଳ ଏସବିଏସପି ମୁଖ୍ୟ ଓମ୍‌ ପ୍ରକାଶ ରାଜଭର ମନ୍ତ୍ରୀ ପଦ ଛାଡିବାକୁ ଗୁରୁବାର ଘୋଷଣା କରିଛନ୍ତି। ବିଜେପି ଠାରୁ ମେଣ୍ଟ ସମ୍ପର୍କ ଛିନ୍ନ କରିବାକୁ ଧମକ ଦେବାର କିଛି ଦିନ ପରେ ରାଜଭର ମନ୍ତ୍ରୀ ପଦ ଛାଡିବାକୁ ଘୋଷଣା କରିଛନ୍ତି। ସୁହେଲଦେବ ଭାରତୀୟ ସମାଜ ପାର୍ଟି (ଏସବିଏସପି)ର ଉତ୍ତରପ୍ରଦେଶ ବିଧାନସଭାରେ ୪ଜଣ ବିଧାୟକ ଅଛନ୍ତି। ଗତ ସପ୍ତାହରେ ଏସବିଏସପି କହିଥିଲା ଯେ ଫେବୃଆରୀ ୨୪ ତାରିଖ ପୂର୍ବରୁ ଯଦି ସାମାଜିକ ନ୍ୟାୟ କମିଟିର ସୁପାରିସ କାର୍ଯ୍ୟକାରୀ ନ ହୁଏ ତେବେ ଦଳ ଏନଡିଏରୁ ଓହରିଯିବ। ଏସବିଏସପି ସାଧାରଣ ସମ୍ପାଦକ ଅରୁଣ ରାଜଭର କହିଥିଲେ ‘ବିଜେପି ଯଦି ଆମର ଦାବିକୁ ପୂରଣ ନ କରେ ତେବେ ଆମେ ମେଣ୍ଟରୁ ଓହରିଯିବୁ ଓ ଆଗାମୀ ଲୋକସଭା ନିର୍ବାଚନରେ ରାଜ୍ୟର ୮୦ଟି ଆସନରୁ ପ୍ରାର୍ଥୀ ଦେବୁ। ଏପରି କି ବିଜେପି ବି​‌ରୋଧୀ ମେଣ୍ଟ ଏସପି-ବିଏସପି ସହିତ ହାତ ମିଳାଇବାକୁ ପଛାଇବୁ ନାହିଁ।’ ଫେବୃଆରୀ ୨୪ ପରେ ବିଜେପି ସହିତ ଏସବିଏସପିର କୌଣସି ସମ୍ପର୍କ ରହିବ ନାହିଁ। ଲୋକସଭା ନିର୍ବାଚନର ୬ ମାସ ପୂର୍ବରୁ ସାମାଜିକ ନ୍ୟାୟ କମିଟିର ସୁପାରିସ କାର୍ଯ୍ୟକାରୀ ନେଇ ବିଜେପି ତାଙ୍କୁ ପ୍ରତିଶ୍ରୁତି ଦେଇଥିଲା। ମାତ୍ର ରାଜ୍ୟ ସରକାର ଏହାକୁ ପୂରଣ କରିବାରେ ବିଫଳ ହୋଇଛି।
ଗତବର୍ଷ ମେ’ରେ ସାମାଜିକ ନ୍ୟାୟ କମିଟି ରାଜ୍ୟ ସରକାରଙ୍କୁ ପଛୁଆ ଜାତିଙ୍କୁ ତିନିଟି ବର୍ଗରେ ଭାଗ କରିବାକୁ ସୁପାରିସ କରିଥିଲା। ପଛୁଆ ଜାତିଙ୍କୁ ପିଛଡା (ପଛୁଆ), ଅତି ପିଛଡା (ଅତି ପଛୁଆ) ଓ ସର୍ବାଧିକ ପିଛଡା (ସବୁଠାରୁ ପଛୁଆ) ଭଳି ତିନିଟି ବର୍ଗରେ ଭାଗ କରିବାକୁ ସୁପାରିସ କରିଥିଲା। ତେବେ ଏହି ସୁପାରିସକୁ ରାଜ୍ୟର ବିଜେପି ସରକାର କାର୍ଯ୍ୟକାରୀ କରି ନାହାନ୍ତି।