ଭୁବନେଶ୍ବର : କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ବୁଧବାର ରାୟଗଡା ସଭାରେ ପହଞ୍ଚିଥିଲେ । ବିଜୟ ସଂକଳ୍ପ ସମାବେଶରେ ଯୋଗଦେଇ ଓଡିଶାରେ ଡବଲ ଇଞ୍ଜିନ ସରକାର ଗଢିବାକୁ ସେ ଲୋକଙ୍କୁ ଆହ୍ବାନ ଦେଇଥିଲେ । ଉଦବୋଧନରେ ବିଜେଡି ଓ କଂଗ୍ରେସ ଉପରେ ବର୍ଷିଥିଲେ ରାଜନାଥ । ଏଥର ୨୧ରୁ ୨୧ରୁ ଲୋକସଭା ଆସନ ବିଜେପି ଜିତିବ ବୋଲି ମଧ୍ୟ ସେ କହିଥିଲେ ।
ବୁଧବାର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ପ୍ରଥମେ ଭବାନୀପାଟଣା ଓ ପରେ ରାୟଗଡା ସଭାରେ ଯୋଗ ଦେଇ କର୍ମୀଙ୍କ ମନୋବଳ ବୃଦ୍ଧି କରିଥିଲେ । ଏହା ସହ ସେ ବିଜେଡି ଓ କଂଗ୍ରେସ ଉପରେ ବର୍ଷିଥିଲେ । ଅନେକ ବର୍ଷ ଧରି କଂଗ୍ରେସ ଶାସନ କଲା । କିନ୍ତୁ ଦେଶରୁ ଦାରିଦ୍ର୍ୟ ଦୂର କରିପାରିଲାନି । କିନ୍ତୁ ମୋଦୀ ସରକାର ୨୫ କୋଟି ଲୋକଙ୍କୁ ଗରିବୀରୁ ମୁକ୍ତ କରିଛି ବୋଲି ସେ କହିଥିଲେ । ଆୟୁଷ୍ମାନ ଭାରତ ଯୋଜନା ପ୍ରସଙ୍ଗ ମଧ୍ୟ ଉଠାଇଥିଲେ ରାଜନାଥ । ରାଜ୍ୟରେ ବିଜେପି ସରକାର ଆସିଲେ ଆୟୁଷ୍ମାନ ଯୋଜନାର ସୁବିଧା ସମସ୍ତଙ୍କୁ ମିଳିବ ବୋଲି ସେ କହିଥିଲେ । ୩୭୦ ହଟାଇବାକୁ କହିଥିଲୁ ଏବଂ ପ୍ରତିଶ୍ରୁତି ପୂରଣ କଲୁ । ଅନ୍ୟ ସରକାର କେବଳ ଆଶ୍ବାସନା ଦିଅନ୍ତି, ପୂରଣ କରନ୍ତିନି । କିନ୍ତୁ ବିଜେପି ସରକାର ଯାହା କୁହେ, ତାହା କରେ ବୋଲି ସେ କହିଥିଲେ ।
କରୋନା ସମୟରେ ଭାରତର ଦକ୍ଷତା ବଖାଣିଥିଲେ ରାଜନାଥ । ବୈଜ୍ଞାନିକଙ୍କ ସହ କଥା ହୋଇ ମୋଦି କରୋନା ଟିକା ପ୍ରସ୍ତୁତ କଲେ । ଆମ ଦେଶର ଲୋକେ ଟିକା ନେବା ସହ ବିଦେଶକୁ ପଠାଗଲା । ୨୦୦୪ରେ ଅର୍ଥନୀତିରେ ଭାରତର ଏକାଦଶ ସ୍ଥାନରେ ଥିଲା । ମୋଦି ପ୍ରଧାନମନ୍ତ୍ରୀ ହେବା ପରେ ପଞ୍ଚମ ସ୍ଥାନକୁ ଉନ୍ନୀତ ହେଲୁ । ୨୦୨୭ରେ ଆମ ଦେଶ ଟପ୍ ଥ୍ରୀ ଭାବେ ଉଭା ହେବ । ଆମେରିକା, ଚୀନ୍ ପଛକୁ ତୃତୀୟ ସ୍ଥାନରେ ରହିବୁ ବୋଲି ସେ କହିଥିଲେ ।
Comments are closed.