ରାସ୍ତା କଡ଼ରୁ ବାଇକ ସହ ଯୁବକର ମୃତଦେହ ଉଦ୍ଧାର, ମୃତ୍ୟୁର କାରଣ ଅସ୍ପଷ୍ଟ

ରାଜନଗର : ରାଜନଗର ବ୍ଲକ ମହୁଲିଆ ପଞ୍ଚାୟତ କଣି ଛକରୁ ଆଦର୍ଶ ବିଦ୍ୟାଳୟକୁ ଯାଇଥିବା ରାସ୍ତା ପାର୍ଶ୍ବରୁ ଜଣେ ଯୁବକର  ମୃତ ଦେହ ଉଦ୍ଧାର କରାଯାଇଛି। ମୃତକ ଯୁବକ ଜଣକ ହେଉଛନ୍ତି ରାଜନଗର ଗାଁର ବସନ୍ତ ମଳିକଙ୍କ ପୁଅ ପର୍ଶୁରାମ ମଳିକ ବୋଲି ଜଣାପଡ଼ିଛି।

ପର୍ଶୁରାମ ରାସ୍ତା କଡରେ ସକାଳୁ ଏକ ଚାଷଜମିରେ ମରି ପଡ଼ିଥିବା ଦେଖିବାକୁ ମିଳିଥିଲା। ସ୍ଥାନୀୟ ଲୋକଙ୍କ କହିବା ଅନୁଯାୟୀ ରାସ୍ତା କଡରେ ଭୋର ସମୟରେ ରକ୍ତ ଜୁଡୁବୁଡୁ ଅବସ୍ଥାରେ ପର୍ଶୁରାମଙ୍କ ମୃତଦେହ ବାଇକ ସହ ପଡି ରହିଥିଲା। ଖବର ପାଇ ରାଜନଗର ପୁଲିସ ମୃତଦେହକୁ ଜବତ ପରେ ରାଜନଗର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲା।

ବିଳମ୍ବିତ ରାତିରେ ଅଜଣା ଗାଡ଼ି ଧକ୍କାରେ ପର୍ଶୁରାମ ମଳିକଙ୍କ ମୃତ୍ୟୁ ସନ୍ଦେହ କରାଯାଉଛି।  ତେବେ ଏହା ଏକ ହତ୍ୟାକାଣ୍ଡ କିମ୍ବା ସଡ଼କ ଦୁର୍ଘଟଣା କାରଣ ଅସ୍ପଷ୍ଟ ରହିଛି ଏବଂ ଏହି ଘଟଣାର ତଦନ୍ତ ଆରମ୍ଭ ହୋଇଛି ବୋଲି ପୁଲିସ ସୂଚନା ଦେଇଛି।