ସାରନଗରୀ : ଗତବର୍ଷ ପରି ଚଳିତ ବର୍ଷ କରୋନା ମହାମାରୀ ସମୟରେ ଆଜି ଦକ୍ଷିଣ ରାଉରକେଲା ସମେତ ସାରନଗରୀର ବିଭିନ୍ନ କଲୋନୀ, ବସ୍ତିରେ ରଜ ସଜବାଜ ପାଳିତ ହୋଇଯାଇଛି । ଆଜି ଗୋଟିଏ ପଟେ ରବିବାର ସପ୍ତାହନ୍ତ ବନ୍ଦ ଯୋଗୁ ଦୋକାନ, ବଜାର ବନ୍ଦଥିବା ବେଳେ ସକାଳ ସାଢେ ସାତଟାରୁ ପ୍ରାୟ ୧ ଘଂଟା ଧରି ଅବିଶ୍ରାନ୍ତ ମୌସୁମୀ ବର୍ଷା ଲୋକଙ୍କୁ ଅଥୟ କରି ପକାଇଥିଲା । ସାରନଗରୀର ରାଜରାସ୍ତା ସକାଳୁ ସମୂର୍ଣ୍ଣ ଭାବେ ଜନଶୂନ୍ୟ ଥିବା ଲକ୍ଷ୍ୟ କରାଯାଇଥିଲା ।
ଅପରପକ୍ଷରେ ରଜ ସଜବାଜ ପାଳନ କରିବା ପାଇଁ ସାରନଗରୀର ବିଭିନ୍ନ କଲୋନୀ, ବସ୍ତି ତଥା ଦକ୍ଷିଣ ରାଉରକେଲା ନିକଟବର୍ତୀ ବିଭିନ୍ନ ଗ୍ରାମାଂଚଳରେ ବାସ କରୁଥିବା କୁଆଁରୀ କନ୍ୟା ମାନେ ତତ୍ପର ହୋଇ ଉଠିଥିବା ଦେଖିବାକୁ ମିଳିଥିଲା । ସେମାନେ ନୂତନ ବସ୍ତ୍ର ପରିଧାନ କରିବା ସହ ପାଦରେ ଅଳତା, ମେହେନ୍ଦୀ ଲଗାଇ ନିଜକୁ ସୁସଜ୍ଜିତ କରିଥିଲେ ।
କୋଭିଡ଼ କଟକଣା ଯୋଗୁ ନିଜ ସଙ୍ଗିନୀ ମାନଙ୍କୁ ମୋବାଇଲ ମାଧ୍ୟମରେ ରଜର ଶୁଭେଚ୍ଛା ବାର୍ତା ପ୍ରଦାନ କରିଥିଲେ । ଆଜି ସମସ୍ତ ଦୋକାନ ବଜାର ବନ୍ଦ ଥିବା ଯୋଗୁ ଫେରିବାଲା(ବୁଲା ବିକାଳି)ର ଡାକ ଦକ୍ଷିଣ ରାଉରକେଲାର ସମସ୍ତ ଗଳିକନ୍ଦିରେ ଶୁଭିଥିଲା । ବିଶେଷ କରି ଫେରିବାଲା ମାନେ ଅଳତା, ସିନ୍ଦୁର, ମେହେନ୍ଦୀ, ବ୍ରେସଲେଟ. ଚୁଡ଼ି, ଆଦି ରଜସଜବାଜରେ ବିକ୍ରି କରିଥିଲେ । ସେହିପରି ଛୋଟ ପିଲା ମାନଙ୍କ ଡ୍ରେସ, ଷ୍ଟେସନାରୀ ସାମଗ୍ରୀ, ଦହିବରା, ଗୁପଚୁପ ବିକ୍ରି କରୁଥିବା ବୁଲା ବିକାଳି ମାନେ ସାରନଗରୀର ବିିଭିନ୍ନ କଲୋନୀ ଓ ବସ୍ତିରେ ବୁଲି ବେପାର ଜାରି ରଖିବା ଆଜି ରଜ ସଜବାଜରେ ଦେଖିବାକୁ ମିଳିଥିଲା । କରୋନାର ଦ୍ୱିତୀୟ ଲହର ବର୍ତମାନ ଜାରି ରହିବା କାରଣରୁ ଅଧିକାଂଶ ଲୋକ ଘରୁ ନବାହାରି ଘରେ ରହି ବନ୍ଧୁ ପରିଜନ ମାନଙ୍କ ସହ ରଜ ସଜବାଜ ପାଳନ କରିଥିବା ଖବର ମିଳିଛି ।
ସେହିପରି ଦକ୍ଷିଣ ରାଉରକେଲା ନିକଟବର୍ତୀ ବିଭିନ୍ନ ଗ୍ରାମ ଯେପରି ଡଲାକୁଦର, ସୁଇଡ଼ିହି, ଟିମଯୋର, ଜଲଦା, ରାମଯୋଡ଼ି, ମୁଣ୍ଡାଯୋର, ମନକୋରେ ବସବାସ କରୁଥିବା ବାସିନ୍ଦା ମାନେ ନିଜକୁ ରଜ ସଜବାଜରେ ସାମିଲ କରିଥିଲେ । ଚଳିତ ବର୍ଷ କରୋନା ଯୋଗୁ ରଜର ଏହି ସଜବାଜ ଏକ ପ୍ରକାର ଫିକା ପଡ଼ି ଯାଇଥିବା ଦେଖିବାକୁ ମିଳିଥିଲା ।
Comments are closed.