ପୁରୀରେ ଲାଗି ରହିଛି ବର୍ଷା; ସମୁଦ୍ର ଅଶାନ୍ତ, ବଢିଛି ଜୁଆର ଉଚ୍ଚତା, ସବୁ ଶିକ୍ଷାନୁଷ୍ଠାନ ପରିସରରେ ଜମିଛି ପାଣି

ପୁରୀ: ଜୱାଦ ପ୍ରଭାବରେ ଗତକାଲି ଠାରୁ ପୁରୀରେ ବର୍ଷା ଲାଗିରହିଛି । ଏହି କାରଣରୁ ସହରର ବିଭିନ୍ନ ସ୍ଥାନରେ ପାଣି ଜମିରହିଛି । ବିଶେଷକରି ବର୍ଷା ଯୋଗୁଁ ପ୍ରାୟ ସମସ୍ତ ଶିକ୍ଷାନୁଷ୍ଠାନ ପରିସରରେ ପାଣି ଜମିରହିଥିବା ଦେଖିବାକୁ ମିଳିଛି । ବାତ୍ୟା ପ୍ରଭାବରେ ସମୁଦ୍ର ଅଶାନ୍ତ ରହିଛି । ଗତକାଲି ଅମାବାସ୍ୟା ଥିବାରୁ ସମୁଦ୍ରରେ ଅଧିକ ଉଚ୍ଚତାରେ ଜୁଆର ସୃଷ୍ଟି ହେଉଛି । ସମୁଦ୍ର ଅଶାନ୍ତ ରହିବା କାରଣରୁ ଲୋକଙ୍କର ସମୁଦ୍ରରେ ଗାଧୋଇବା ଉପରେ ନିଷେଧାଦେଶ ଜାରି କରାଯାଇଛି । ବେଳାଭୂମିରେ ପୁଲିସ ଜଗି ରହିଛି । ବେଳାଭୂମି ସହିତ ସାରା ସହରର ରାସ୍ତା ଖାଁ ଖାଁ ଲାଗୁଛି । ପୁରୀ ଓ ଚିଲିକା ସମୁଦ୍ର କୁଳରେ ରହୁଥିବା ଲୋକଙ୍କୁ ପ୍ରଶାସନ ପକ୍ଷରୁ ନିରାପଦ ସ୍ଥାନାକୁ ସ୍ଥାନାନ୍ତର କରାଯାଇଛି । ଏଥିସହିତ ସମସ୍ତ ଆସନ୍ନ ପ୍ରସବା ମହିଳାଙ୍କୁ ପ୍ରଶାସନ ପକ୍ଷରୁ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି । ସହରର ଅଧିକାଂଶ ସ୍ଥାନରେ ଦୋକାନ ବଜାର ବନ୍ଦ ରହିଥିବାବେଳେ ମହାପ୍ରଭୁ ଶ୍ରୀଜଗନ୍ନାଥଙ୍କର ସେବାପୂଜା ଯଥାରୀତି ଜାରି ରହିଛି । ତେବେ ଶ୍ରୀମନ୍ଦିର ମଧ୍ୟକୁ ଭକ୍ତଙ୍କର ପ୍ରବେଶ ବନ୍ଦ କରିଦିଆଯାଇଛି । ବଡଦାଣ୍ଡରେ ଜମିରହିଥିବା ବର୍ଷାପାଣିକୁ ପୌରସଂସ୍ଥା ପକ୍ଷରୁ ନିଷ୍କାସନ କରାଯାଉଛି । ଏଥିସହିତ ସମସ୍ତ ସମ୍ଭାବ୍ୟ ପରିସ୍ଥିତିର ମୁକାବିଲା କରିବାକୁ ପ୍ରଶାସନ ସଜାଗ ରହିଥିବା ଜଣାଯାଇଛି ।