ସମ୍ବଲପୁର : ସମ୍ବଲପୁର ମହାନଗର ନିଗମ ଅର୍ନ୍ତଗତ ବୁର୍ଲା ଅଞ୍ଚଳରୁ ବେଆଇନ ଭାବେ ରେଳ ଟିକେଟ କାରବାର କରୁଥିବା ଅଭିଯୋଗରେ ରେଳବାଇ ସୁରକ୍ଷା ବଳ ଜଣଙ୍କୁ ଗିରଫ କରିଛି । ସୂଚନାନୁଯାୟୀ, ରେଳବାଇର କେନ୍ଦ୍ରୀୟ ମନିଟରିଂ ଦଳ ଦ୍ୱାରା ବୁର୍ଲା ଅଞ୍ଚଳର ଆଇଜି ମାର୍କେଟ (ବସଷ୍ଟାଣ୍ଡ) ଅଞ୍ଚଳରେ ବେଆଇନ ଭାବରେ ବ୍ୟକ୍ତିଗତ ଆଇଡିରୁ ବହୁ ଟିକେଟ ବୁକିଂ ହେଉଥିବାର ଠାବ କରିବା ପରେ ଖବର ସମ୍ବଲପୁର ଆରପିଏଫ ନିକଟରେ ପହଞ୍ଚିଥିଲା । ଏଣୁ ଆରପିଏଫ ଅଧିକାରୀ ଏମ. ଯାଦବ, ଏସଆଇ ସିଏଚ ନିହାରିକା, ଏସଆଇ ମୁକେଶ କୁମାର, ବିମଳ ଦାଶ, ପି. ପ୍ରଧାନ, ସି. ଖରସେଲ ପ୍ରମୁଖ ବୁର୍ଲା ଠାରେ ଉକ୍ତ ବ୍ୟକ୍ତିଙ୍କ ଜୋତା ଦୋକାନରେ ବୁଧବାର ସନ୍ଧ୍ୟା ସମୟରେ ଅଚାନକ ଚଢ଼ଉ କରିଥିଲେ। ଚଢ଼ଉ ସମୟରେ ଅଭିଯୁକ୍ତ ପ୍ରକାଶ ଛାବରିଆଙ୍କ ନିକଟରୁ ଅନେକ ଯାତ୍ରୀବାହୀ ରେଳଗାଡିର ଇ-ରେଳ ଟିକେଟ ମିଳିଥିଲା । ଅଭିଯୁକ୍ତ ରେଳବାଇର ଅଧିକୃତ ଏଜେଣ୍ଟ ନ ଥିବା ବେଳେ ଅଧିକ ଲାଭ ପାଇଁ ସେ ତାଙ୍କର ମୋବାଇଲ ଫୋନ ଜରିଆରେ ଟିକେଟ ବୁକିଂ କରୁଥିଲେ। ରେଳବାଇ ନିୟମାନୁଯାୟୀ ଏହା ବେଆଇନ ହୋଇଥିବାରୁ ସମ୍ବଲପୁର ଆରପିଏଫ ଥାନାରେ ଏକ ମାମଲା ରୁଜୁ କରାଯାଇ ଅଭିଯୁକ୍ତଙ୍କୁ ଗିରଫ କରାଯାଇ ଗୁରୁବାର ଅଦାଲତକୁ ଚାଲାଣ କରାଯାଇଛି ବୋଲି ପୁଲିସ କହିଛି । ସୂଚନାଯୋଗ୍ୟ ଯେ, ବିଗତ ୨୦୧୯ ମସିହାରେ ବେଆଇନ ଭାବରେ ରେଳ ଟିକେଟ କାରବାର କରୁଥିବା ଅଭିଯୋଗରେ ୩ ଥର ବିଭିନ୍ନ ସ୍ଥାନରେ ଆରପିଏଫ ଚଢ଼ଉ କରି ୩ ଜଣଙ୍କୁ ଗିରଫ କରିବା ସହିତ ବହୁ ଇ-ଟିକେଟ ଏବଂ କମ୍ପ୍ୟୁଟର ଆଦି ଜବତ କରିଥିଲା।
Comments are closed.