ପୁରୀ : ଚାଲିଛି ମହାପ୍ରଭୁଙ୍କ ନବଦିନାତ୍ମକ ଯାତ୍ରା । ପୁଣି ପୁରୀରେ ଭାଙ୍ଗିଲେ ରୋଷ ଘର ଚୁଲି। ପୁରୀ ଗୁଣ୍ଡିଚା ମନ୍ଦିର ରୋଷଘର ଚୁଲି ଭାଙ୍ଗିଥିବା ନେଇ ଶନିବାର ଖବର ମିଳିଛି। ପ୍ରାୟ ୨୦ ରୁ ଅଧିକ ଚୁଲି ଦୁର୍ବୃତ୍ତ ଭାଙ୍ଗି ଦେଇଥିବା ନେଇ ସୂଚନା ମିଳିଛି। ଗତକାଲି ରାତିରେ ରୋଷ ଘରେ ପଶି କେହି ଚୁଲି ଭାଙ୍ଗିଥିବା ନେଇ ଆଶଙ୍କା କରାଯାଉଛି। ଆଡପ ଅବଢା ରନ୍ଧା ପାଇଁ ପ୍ରସ୍ତୁତ ହୋଇଥିଲା ଚୁଲି। କୋଠ ଭୋଗ ଚୁଲିକୁ ଛାଡି ଅନ୍ୟ ସମସ୍ତ ଚୁଲି ଭଙ୍ଗା ଯାଇଛି । ତେବେ କିଏ ଓ କାହିଁକି ଏପରି କରିଛି ସେନେଇ କୌଣସି ସ୍ପଷ୍ଟତା ମିଳି ପାରି ନାହିଁ। ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି। ଉପଜିଲ୍ଲାପାଳ ମଧ୍ୟ ପହଞ୍ଚିଛନ୍ତି। ବର୍ତ୍ତମାନ ମହାପ୍ରଭୁଙ୍କ ନବଦିନାତ୍ମକ ଯାତ୍ରା ସମୟରେ ଏଭଳି ଘଟଣା ଘଟିଥିବାରୁ ଓ କଡା ପୁଲିସ ପ୍ରଶାସନ ସତ୍ତେ୍ୱ ଏଭଳି ଘଟଣା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ପ୍ରାୟ ୭୫୨ ଟି ଚୁଲିରୁ ୨୦ରୁ ଅଧିକ ଚୁଲି ଭଙ୍ଗା ଯାଇଛି। ଚୁଲି ଗୁଡିକୁ ହାତରେ ଭଙ୍ଗା ଯାଇଛି ବୋଲି କୁହାଯାଉଛି।
ସୂଚନା ଯୋଗ୍ୟ , ପୂର୍ବରୁ ମଧ୍ୟ ଗତ ଏପ୍ରିଲ ମାସରେ ଏଭଳି ଘଟଣା ଘଟିଥିଲା। ଘଟଣାର ତଦନ୍ତ କରାଯାଇ ଜଣଙ୍କୁ ଗିରଫ ମଧ୍ୟ କରାଯାଇଥିଲା।
