ପବିତ୍ର ମକର ସଂକ୍ରାନ୍ତି: ଶ୍ରୀମନ୍ଦିରରେ ମକରଚୌରାଶୀ ବେଶରେ ଦର୍ଶନ ଦେବେ​‌ ଶ୍ରୀଜିଉ

ପୁରୀ: ସୋମବାର ପବିତ୍ର ମକର ସଂକ୍ରାନ୍ତି। ଏହି ଅବସରରେ ଶ୍ରୀଜିଉ ମକର ଚୌରାଶି ବେଶରେ ଦର୍ଶନ ଦେବେ । ସେପଟେ ପୁରପଲ୍ଲୀରେ ଇଷ୍ଟ ଦେବାଦେବୀଙ୍କୁ ମକର ଚାଉଳ ଅର୍ପଣ କରି ଲୋକେ ପର୍ବ ପାଳୁଛନ୍ତି। ଇଷ୍ଟଦେବାଦେବୀଙ୍କ ଠାରେ ଲାଗି ହେବା ପରେ ଘରେ ଘରେ ଲୋକେ ମକର ଭୋଗ ଖାଇବେ । ନୁଆ ବସ୍ତ୍ର ପିନ୍ଧି ଘରର ବୟୋଜ୍ୟେଷ୍ଠ ମାନଙ୍କୁ ମୁଣ୍ଡିଆ ମାରିବେ । ଏହାପରେ ଘରେ ପ୍ରସ୍ତୁତ ଭଳିକି ଭଳି ପିଠା ସହିତ ମିଠା ଖାଇବା ସହ ଗୁଡି ଉଡାଇବାର ମଧ୍ୟ ପରମ୍ପରା ରହିଛି ।

ତେବେ ସୁରକ୍ଷା ଦୃଷ୍ଟିରୁ ଗୁଡି ଉଡାଇବାବେଳେ ମାଞ୍ଜା ସୂତା ବ୍ୟବହାର ନକରିବାକୁ ପୁଲିସ କଡା ଚେତାବନୀ ଦେଇଛି । ସେପଟେ କଟକ, ବାଲେଶ୍ବର, ମୟୁରଭଞ୍ଜ ଜିଲ୍ଲାରେ ମକର ମେଳା ଆରମ୍ଭ ହୋଇଛି। ଅନ୍ୟପଟେ ସୋମବାରଠାରୁ ସୂର୍ଯ୍ୟଙ୍କର ଉତ୍ତରାୟଣ ଗତି ହେବ । ଧିରେ ଧିରେ ଦିନ ବଢିବା ସହ ରାତି କମିବ । ଦକ୍ଷିଣ ଭାରତରେ ବି ପୋଙ୍ଗଲର ମାହୋଲ ଜମୁଛି । ପୋଙ୍ଗଲର ଶେଷ ଦିନ ଥିବାରୁ ତେଲୁଗୁ ସମ୍ପ୍ରଦାୟର ଭାଇଭଉଣୀ ମାନେ ଏହି ପର୍ବକୁ ଧୂମଧାମ ସହକାରେ ପାଳନ କରୁଛନ୍ତି।