କାକଟପୁର : ପୁରୀ ଜିଲା କାକଟପୁର ସ୍ଥିତି ମା’ମଙ୍ଗଳା ମନ୍ଦିରରେ ସୋମବାର ସାଧାରଣଦର୍ଶନ ବନ୍ଦ ରହିଛି । ମନ୍ଦିରର ପୂର୍ବଦ୍ବାର ନିକଟରେ ସେବକ ସଂଘ ଧାରଣାରେ ବସି ରହିଛନ୍ତି । ଗତକାଲି ମନ୍ଦିରରେ ଗଣ୍ଡଗୋଳ ସମୟରେ ସେବାକଙ୍କୁ ମାଡ ମାରିଥିବା ମହିଳାଙ୍କ ସମ୍ପର୍କୀୟମାନଙ୍କୁ ଗିରଫ କରିବା ଦାବିରେ ଧାରଣା ଦିଆଯାଇଛି । ଶ୍ରଦ୍ଧାଳୁମାନେ ପଶ୍ଚିମଦ୍ବାର ଦେଇ ମା’ଙ୍କୁ ଦର୍ଶନ କରୁଥିବା ବେଳେ ସର୍ବସାଧାରଣଙ୍କ ପୂଜାରେ ସେବାକମାନେ ଅସହଯୋଗ କରିଛନ୍ତି । ଏହାକୁ ନେଇ ଶ୍ରଦ୍ଧାଳୁଙ୍କ ମନରେ ଶକ୍ତ ଆଘାତ ଲାଗିଛି ।
ସୂଚନାଯୋଗ୍ୟ, ରବିବାର ଦିନ ମା’ମଙ୍ଗଳାଙ୍କ ମନ୍ଦିରରେ ଜଣେ ମହିଳା ଶ୍ରଦ୍ଧାଳୁଙ୍କୁ ଠେଲାପେଲା କରିବା ସହ ତାଙ୍କୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଥିଲା । ଏହାକୁ ନେଇ ଘଟଣାସ୍ଥଳରେ ମହିଳାଙ୍କ ସମ୍ପର୍କୀୟ ଓ ସେବକଙ୍କ ମଧ୍ୟରେ ପାଟିତୁଣ୍ଡ ହେବା ସହ ଉତ୍ତେଜନା ପ୍ରକାଶ ପାଇଥିଲା । ଏହି ଘଟଣାରେ ପୁଲିସ୍ ୩ ସେବକଙ୍କୁ ଗତକାଲି ଗିରଫ କରିଥିଲା । ତିନି ସେବକଙ୍କ ଗିରଫ ପ୍ରତିବାଦରେ ସୋମବାର ସେବାକ ସଂଘ ପକ୍ଷରୁ ମା’ମଙ୍ଗଳା ମନ୍ଦିରର ପୂର୍ବଦ୍ବାର ନିକଟରେ ଧାରଣା ଦିଆଯାଇଛି ।