ତେଲଙ୍ଗାନା : ଲଗାତାର ଭାବେ ଅନ୍ଲାଇନ୍ ଗେମ୍ ‘ପବ୍ଜୀ’ ଖେଳି ଜଣେ ୧୯ ବର୍ଷୀୟ ଯୁବକଙ୍କ ମସ୍ତିଷ୍କରେ ରକ୍ତ ଜମାଟ ବାନ୍ଧି ଯାଇଛି। ଅବସ୍ଥା ଗୁରୁତର ହେବାରୁ ତାଙ୍କୁ ଆସିୟୁରେ ଭର୍ତ୍ତି କରାଯାଇଛି।
ସୂଚନା ଅନୁଯାୟୀ, ତେଲଙ୍ଗାନାର ୱନପାର୍ଥୀ ଜିଲାରେ ବିଏସ୍ସି ଦ୍ୱିତୀୟ ବର୍ଷର ଜଣେ ଛାତ୍ରଙ୍କ ମସ୍ତିଷ୍କରେ ରକ୍ତ ଜମାଟ ବାନ୍ଧି ଅବସ୍ଥା ଗୁରୁତର ହୋଇପଡ଼ିଛି। ତାଙ୍କୁ ସିଟି ହସ୍ପିଟାଲର ଆଇସିୟୁରେ ଭର୍ତ୍ତି କରାଯାଇଛି। ଡାକ୍ତରଙ୍କ କହିବାନୁସାରେ, ତାଙ୍କର ଖାଦ୍ୟପେୟରେ ବ୍ୟତିକ୍ରମ କାରଣରୁ ହଠାତ୍ ତାଙ୍କ ଓଜନ କମ୍ ହେବାକୁ ଲାଗିଥିଲା। ଖାଇବା ପିଇବା ଛାଡ଼ି ସେ ଦିନରେ ୬-୭ ଘଣ୍ଟା ପର୍ଯ୍ୟନ୍ତ ପବ୍ଜୀ ଖେଳୁଥିଲେ। ୨୬ ଅଗଷ୍ଟରେ ତାଙ୍କ ଡାହାଣ ଗୋଡ଼ ଓ ହାତ ଅକାମୀ ହୋଇଯାଇଥିଲା। ଏହାପରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା ଓ ଚିକିତ୍ସା ସମୟରେ ଜଣାପଡ଼ିଥିଲା ଯେ ଲଗାତର ପବ୍ଜୀ ଖେଳିବା ଓ କୁପୋଷଣ କାରଣରୁ ସେ ବଦହଜମୀ(ଡିହାଇଡ୍ରେସନ)ର ଶିକାର ହୋଇଥିଲେ। ଡାକ୍ତରମାନେ ଏହା ମଧ୍ୟ କହିଥିଲେ ଯେ, ପବ୍ଜୀରେ ପ୍ରତିଦ୍ୱନ୍ଦ୍ୱିତା କାରଣରୁ ସେ ମାନସିକ ଚାପଗ୍ରସ୍ତ ଥିଲେ। ପରୀକ୍ଷା-ନିରୀକ୍ଷାରୁ ଜଣାପଡ଼ିଥିଲା ତାଙ୍କ ମସ୍ତିଷ୍କରେ ରକ୍ତ ଜମାଟ ବାନ୍ଧିଛି। ତାଙ୍କୁ ଚିକିତ୍ସା କରୁଥିବା ଡାକ୍ତରଙ୍କ କହିବା ଅନୁସାରେ, ଯେତେବେଳେ ତାଙ୍କୁ ଡାକ୍ତରଖାନା ଅଣାଯାଇଥିଲା ସେତେବେଳେ ସେ ସମ୍ପୂର୍ଣ୍ଣ ହୋସ୍ରେ ନଥିଲେ ଓ କିଛି ପଚାରିଲେ ଜବାବ ଦେଇ ପାରୁନଥିଲେ। ପୀଡ଼ିତଙ୍କ ମାଆଙ୍କ କହିବା ଅନୁଯାୟୀ, ପୁଅକୁ ଯେତେବେଳେ ବି ସମୟ ମିଳୁଥିଲା ସେ ପବ୍ଜୀ ଖେଳୁଥିଲା ଓ ମଝିରେ ମଝିରେ ଖବରକାଗଜ ବାଣ୍ଟିବାକୁ ଯାଉଥିଲା। ଛୁଟିଦିନ ମାନଙ୍କରେ ସେ ପୁରା ଦିନ ପବ୍ଜୀ ଖେଳିବାରେ ହିଁ ବିତାଇଥାଏ।
ସୂଚନାଯୋଗ୍ୟ, ପୂର୍ବରୁ ମଧ୍ୟ ଏହିପରି ଅନ୍ଲାଇନ୍ ଗେମ୍ ନିଶାରେ ଅନେକ ଯୁବକ-ଯୁବତୀ ମୃତ୍ୟୁ ଓ ରୋଗର ଶିକାର ହୋଇଛନ୍ତି।
Comments are closed.