ଇସଲାମାବାଦ: ପାକିସ୍ତାନରେ ନିକଟରେ ଅନୁଷ୍ଠିତ ହୋଇଥିବା ସାଧାରଣ ନିର୍ବାଚନର ଫଳାଫଳ ବିରୋଧରେ ପାକିସ୍ତାନ ତେହେରିକ୍-ଏ-ଇନ୍ସାଫ୍(ପିଟିଆଇ) ଦେଶବ୍ୟାପୀ ବିକ୍ଷୋଭ ପ୍ରଦର୍ଶନ କରିବ। ଜନାଦେଶର ଲୁଟ୍ ହୋଇଥିବା ଅଭିଯୋଗ କରି ଦଳ ମୁଖ୍ୟ ଇମ୍ରାନ ଖାନଙ୍କ ଆହ୍ବାନକ୍ରମେ ମାର୍ଚ୍ଚ ୨ରେ ବିରୋଧ ପ୍ରଦର୍ଶନ କରିବା ନେଇ ଘୋଷଣା କରିଛି ପିଟିଆଇ। ଦଳର ସେକ୍ରେଟାରୀ ଜେନେରାଲ ତଥା ପ୍ରଧାନମନ୍ତ୍ରୀ ପ୍ରାର୍ଥୀ ଓମାର ଆୟୁବ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ନିର୍ବାଚନରେ ହୋଇଥିବା ବ୍ୟାପକ ଅନିୟମିତତା ବିରୋଧରେ ଅନ୍ୟ ରାଜନୈତିକ ଦଳଙ୍କ ସହ ଦେଶବ୍ୟାପୀ ବିକ୍ଷୋଭ ପ୍ରଦର୍ଶନ କରିବ ପିଟିଆଇ। ଏହାପୂର୍ବରୁ ସେ ପିଟିଆଇ ପ୍ରତିଷ୍ଠାତା ତଥା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ମଧ୍ୟ ଭେଟିଛନ୍ତି, ଯିଏକି ବର୍ତ୍ତମାନ ରାୱଲପିଣ୍ଡିର କଡ଼ା ସୁରକ୍ଷା ବିଶିଷ୍ଟ ଆଦିଆଲା ଜେଲରେ ଅଛନ୍ତି।
ଅପରପକ୍ଷେ ସ୍ଥାନୀୟ ଗଣମାଧ୍ୟମ ରିପୋର୍ଟ କରିଛି ଯେ, ନିର୍ବାଚନ କମିଶନ ଶୁକ୍ରବାର ରାଷ୍ଟ୍ରପତି ନିର୍ବାଚନ ପାଇଁ କାର୍ଯ୍ୟସୂଚୀ ପ୍ରକାଶ କରିବେ। ପାକିସ୍ତାନ ପିପୁଲ୍ସ ପାର୍ଟିର ଆସିଫ ଅଲୀ ଜରଦାରୀ ରାଷ୍ଟ୍ରପତି ନିର୍ବାଚନରେ ବାଜିମାତ୍ କରିବାର ଅଧିକ ସମ୍ଭାବନା ରହିଛି।
Comments are closed.