ଦିଲୀରେ ସରକାରୀ ବଙ୍ଗଳା ଛାଡ଼ିବାକୁ ନୋଟିସ ପରେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ଗୁରୁଗାଓଁକୁ ସ୍ଥାନାନ୍ତରିତ ହେବେ। ଗୁରୁଗାଓଁ ଗଲ୍ଫ କୋର୍ସ ରୋଡ଼ସ୍ଥିତ ଏକ ଦାମୀ ହାଉସିଂ ସୋସାଇଟିକୁ ସେ ପରିବାର ସହ ଯିବେ । ସୋସାଇଟିରେ ତାଙ୍କର ଫ୍ଲାଟର ମରାମତି କାର୍ଯ୍ୟ ଶେଷ ହୋଇଛି ଏବଂ ସୁରକ୍ଷା ସଂକ୍ରାନ୍ତ ଅନୁମତି ମିଳିବା ପରେ ସେ ପରିବାର ସହ ୩୦ ଜୁଲାଇ ମଧ୍ୟରେ ସେଠାକୁ ଚାଲିଯିବେ । ଗଲ୍ଫ କୋର୍ସ ରୋଡ଼ରେ ଆରାଲିଆଜ ଓ ମ୍ୟାଗନୋଲିଆ ନାମରେ ଦୁଇଟି ସୋସାଇଟି ରହିଛି । ଡ଼ିଏଲଏଫ୍ ଏହାର ନିର୍ମାଣ କରିଛି। ଏହି ଦୁଇ ଆପାର୍ଟମେଣ୍ଟରେ ଦେଶର ବହୁ ନାମୀଦାମୀ ବ୍ୟକ୍ତି ରହୁଛନ୍ତି । ରାଜନୀତି, କ୍ରୀଡ଼ା, ବଲିଉଡ଼ ଓ ଶିଳ୍ପ ଜଗତ ସହ ସମ୍ପୃକ୍ତ ବହୁ ବଡ଼ବଡ଼ ଲୋକ ଏଠାରେ ରହୁଛନ୍ତି । ଆରାଲିଆଜ ସୋସାଇଟିରେ ପ୍ରିୟଙ୍କାଙ୍କ ସ୍ବାମୀ ରବର୍ଟ ଭଦ୍ରାଙ୍କର ବି ଫ୍ଲାଟ ରହିଥିବା କୁହାଯାଉଛି । ଆରିଲିଆଜ ସୋସାଇଟି ଗୁରୁଗାଓଁର ସବୁଠୁ ମହଙ୍ଗା ସୋସାଇଟି ମଧ୍ୟରୁ ଗୋଟାଏ । ଏଠାରେ ୪ ବେଡ଼ରୁମ୍ ବାଲା ଫ୍ଲାଟର ଦାମ୍ ୧୨ କୋଟିରୁ ଆରମ୍ଭ ହୋଇଥାଏ । ଏଠାରେ ସାଧାରଣତଃ ଭଡ଼ାରେ ଫ୍ଲାଟ ମିଳେନାହିଁ, ତଥାପି ୪ ବେଡ଼ରୁମ୍ ବାଲା ଫ୍ଲାଟର ମାସିକ ଭଡ଼ା ଅନ୍ୟୂନ ୨.୫ ଲକ୍ଷ କିମ୍ବା ଏହାଠୁ ଅଧିକ ।
ଗତ କିଛିଦିନ ହେଲା ଏହି ସୋସାଇଟିରେ ସୁରକ୍ଷା କର୍ମୀଙ୍କ ଯାତାୟତ ବୃଦ୍ଧି ପାଇଛି । କୁହାଯାଉଛି ଯେ ପ୍ରିୟଙ୍କା ଗାନ୍ଧୀ ଏହି ସୋସାଇଟିରେ ବାସିନ୍ଦା ହେବେ । ଯେଉଁ ଫ୍ଲାଟରେ ପ୍ରିୟଙ୍କା ରହିବେ ବୋଲି କୁହାଯାଉଛି ସେଠାରେ ରଙ୍ଗକାମ ଓ ଅନ୍ୟାନ୍ୟ ମରାମତି କାର୍ଯ୍ୟ ବି ଶେଷ ହୋଇଛି । ଏଠାକାର ସୁରକ୍ଷା ବ୍ୟବସ୍ଥା ବେଶ୍ କଡ଼ାକଡ଼ି । ଡ଼ିଏଲ୍ଏଫ୍ ପକ୍ଷରୁ ଦ୍ବିସ୍ତରୀୟ ସୁରକ୍ଷା ବ୍ୟବସ୍ଥା ତ ରହିଛି, ଏହା ସହ ଏଠାରେ ରହୁଥିବା ଲୋକମାନଙ୍କର ମଧ୍ୟ ନିଜସ୍ବ ସୁରକ୍ଷା ବ୍ୟବସ୍ଥା ରହିଛି । ସିକ୍ୟୁରିଟି କ୍ଲିୟରାନ୍ସ ମିଳିବା ପରେ ପ୍ରିୟଙ୍କା ଏଠାକୁ ସ୍ଥାନାନ୍ତର ହେବେ ବୋଲି କୁହାଯାଉଛି । ସୋସାଇଟିରେ ୧୧ଟି ଟାୱାର ରହିଛି ଓ ପ୍ରତ୍ୟେକ ଟାୱାର ୧୭ ମହଲା ।
Comments are closed.