ବର୍ତ୍ତମାନ ସମୟରେ ସମସ୍ତଙ୍କ ଘରେ ଆଳୁ ପରିବାଟି ଆବଶ୍ୟକ ପରିମାଣରେ ମହଜୁଦ୍ ଅଛି। ମଧୁମେହ ରୋଗୀଙ୍କ ବ୍ୟତୀତ ଅନ୍ୟମାନେ କମ୍ବେଶୀ ଆଳି ପ୍ରସ୍ତୁତ ବ୍ୟଞ୍ଜନ ଖାଇପାରିବେ। ଆଳୁକୁ ବ୍ୟବହାର କରି ପ୍ରସ୍ତୁତ କରନ୍ତୁ ସୁଆଦିଆ କଟଲେଟ୍। କମ୍ ସମୟରେ ମଧ୍ୟ ଏହା ପ୍ରସ୍ତୁତ ହୋଇଯିବ।
ଆବଶ୍ୟକ ସାମଗ୍ରୀ: ସିଝା ଆଳୁ ବଡ଼ ୪ଟି, ପିଆଜ ଫାଳେ ଚୂନାଚୂନା କଟା, ରସୁଣ ୨ ପାଖୁଡ଼ା ଚୂନା କଟା, ଧନିଆ ପତ୍ର ଅଳ୍ପ, ଗରମ ମସଲା ଅଧ ଚାମଚ, ଜିରା ଗୁଣ୍ଡ ଅଧ ଚାମଚ, ଆମଚୁର ପାଉଡର ଅଧ ଚାମଚ, ଚାଉଳ ଗୁଣ୍ଡ ୧କପ୍, ଲୁଣ ସ୍ବାଦାନୁସାରେ, ତେଲ ୫ଚାମଚ।
ପ୍ରସ୍ତୁତି: ପ୍ରଥମେ ସିଝା ଆଳୁକୁ ଭଲଭାବେ ଚକଟିନେବେ। ସେଥିରେ ସମସ୍ତ ସାମଗ୍ରୀ ଭଲଭାବେ ମିଶାଇ ଦିଅନ୍ତୁ। ଏବେ ୧୦ ମିନିଟ୍ ସେହି ପାତ୍ରକୁ ଘୋଡ଼ାଇ ରଖିବେ। ଗୋଟିଏ ତାୱା ନେଇ ଚୁଲାରେ ବସାଇ ତେଲ ଗରମ କରନ୍ତୁ। ଏପାଖେ ଆଳୁ ଚକଟାକୁ ଗୋଲଗୋଲ ଆକାର ଦେଇ ତେଲରେ ଭାଜିବା ପାଇଁ ତାୱାରେ ରଖନ୍ତୁ। ଦୁଇ ପାଖ ହାଲକା ବାଦାମୀ ରଙ୍ଗ ହେବା ପରେ କାଢ଼ିନେବେ। କଟଲେଟକୁ ତେଲରେ ଛାଣିବା ପରିବର୍ତ୍ତେ ଏଇ ଉପାୟରେ ଭାଜିନେବା ଭଲ। ପିଲାଙ୍କୁ ସନ୍ଧ୍ୟା ଜଳଖିଆରେ ଟମାଟୋ ସସ୍ ସହ ମିଶାଇ ଖାଇବାକୁ ଦିଅନ୍ତୁ। ସେମାନଙ୍କୁ ଖୁବ୍ ପସନ୍ଦ ଆସିବ।
