ଲକ୍ଷ୍ନୌ: ବଲିଉଡ୍ ନାୟିକା କନିକା କପୁର କରୋନା ଯୁଦ୍ଧକୁ ଜିତିବା ପରେ ଏବେ କ୍ବାରେଣ୍ଟାଇନରେ ଅଛନ୍ତି। କିନ୍ତୁ ତାଙ୍କ ସମସ୍ୟା କମ୍ ହୋଇନାହିଁ। ସୋମବାର ପୁଲିସ ଟିମ୍ ଲକ୍ଷ୍ନୌ ମହାନଗରସ୍ଥିତ ଶାଲୀମାର ଗ୍ୟାଲାଣ୍ଟ ଆପାର୍ଟମେଣ୍ଟରେ ଥିବା କନିକାଙ୍କ ଘରେ ପହଞ୍ଚି ତାଙ୍କୁ ନୋଟିସ ଦେଇଛି। ଆସନ୍ତା ୩୦ ତାରିଖରେ ତାଙ୍କ ବୟାନ ରେକର୍ଡ କରାଯିବ। ଏଥିପାଇଁ ଆଇନଗତ ପ୍ରକ୍ରିୟା ଆରମ୍ଭ ହୋଇଯାଇଛି ବୋଲି ତଦନ୍ତ ଅଧିକାରୀ ଜେ.ପି. ସିଂହ କହିଛନ୍ତି। କନିକା ତଦନ୍ତରେ ସହଯୋଗ କରୁଥିବା ସିଂହ କହିଛନ୍ତି।
ସୂଚନାଯୋଗ୍ୟ, କନିକା କପୁରଙ୍କ ବିରୋଧରେ ସରୋଜିନୀ ନଗର ଥାନାରେ ଅନ୍ୟମାନଙ୍କ ଜୀବନକୁ ବିପଦରେ ପକାଇବା ସହିତ ଆଇପିସି ଧାରା ୧୮୮, ୨୬୯ ଏବଂ ୨୭୦ ଅଧୀନରେ ମାମଲା ରୁଜୁ ହୋଇଛି। କନିକା ଏବେ ନିଜ ଘରେ ପରିବାର ସହିତ ରହୁଛନ୍ତି। ଗତ ରବିବାର ସେ ସୋସିଆଲ ମିଡିଆରେ ଏକ ପୋଷ୍ଟ କରି ନିଜର ମତ ରଖିବା ସହିତ ସେ ନିର୍ଦୋଷ ବୋଲି କହିଥିଲେ।
