ମୋଧେରା ଦେଶର ପ୍ରଥମ ‘ସୌର’ ଗ୍ରାମ ; ଘୋଷଣା କରିବେ ମୋଦୀ

ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆସନ୍ତାକାଲି (ରବିବାର)ଠାରୁ ୩ ଦିନ ପାଇଁ ଗୁଜରାଟ ଗସ୍ତରେ ଯିବେ। ଏହି ଅବସରରେ ସେ ସାଢେ ୧୪ ହଜାର କୋଟି ଟଙ୍କାର ବିଭିନ୍ନ ଉନ୍ନୟନ ମୂଳକ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରିବେ। ଏହି ତିନି ଦିନିଆ ଗସ୍ତ କାଳରେ ସେ ମେହଶଣା, ଭରୁଚ, ଆନନ୍ଦ, ଜାମନଗର, ରାଜକୋଟ ଓ ଅହମ୍ମଦାବାଦ ଗସ୍ତ କରିବେ। ଗସ୍ତର ପ୍ରଥମ ଦିନରେ ଶ୍ରୀ ମୋଦୀ ଉତ୍ତର ଗୁଜରାଟର ମେହଶଣାଠାରେ ୨ହଜାର ୮୯୦ କୋଟି ଟଙ୍କା ମୂଲ୍ୟର ଉନ୍ନୟନ ମୂଳକ ପ୍ରକଳ୍ପର ଶିଳାନ୍ୟାସ ଓ ଉଦ୍‍ଘାଟନ କରିବେ। ଏହି ପ୍ରକଳ୍ପ ଗୁଡ଼ିକ ମଧ୍ୟରେ ୫୧୧ କୋଟି ଟଙ୍କାରେ ନିର୍ମିତ ସାବରମତୀ ଜଗୁଦାଁ, ଗେଜ୍‍ କନ୍‍ଭର୍ସନ ଏବଂ ସିଏନ୍‍ଜି ସ୍ଥଳଭାଗ ସୁବିଧା କେନ୍ଦ୍ରର ଉଦ୍‍ଘାଟନ୍‍ ଅନ୍ତର୍ଭୁକ୍ତ ରହିଛି ।
ସେହିପରି ସୂର୍ଯ୍ୟମନ୍ଦିରର ଗାଁ ଭାବେ ଜଣାଶୁଣା ମୋଧେରା ଗାଁ ଦେଶର ପ୍ରଥମ ସୌରଶକ୍ତି ସଂପନ୍ନ ଗାଁ ଭାବେ ଘୋଷଣା ହେବ। ଏହି ଗସ୍ତକାଳରେ ପ୍ରଧାନମନ୍ତ୍ରୀ ମୋଧେରା ଗାଁକୁ ଦେଶର ପ୍ରଥମ ସୌରଶକ୍ତି ସଂପନ୍ନ ଗାଁ ଭାବେ ଘୋଷଣା କରିବେ। ଭାରତ ସରକାର ଓ ଗୁଜରାଟ ସରକାରଙ୍କ ମିଳିତ ଉଦ୍ୟମରେ ୮୦ କୋଟି ଟଙ୍କା ବିନିମୟରେ ସେହି ଗାଁରେ ସୌରପ୍ରକଳ୍ପ ସ୍ଥାପନ କରାଯାଇଛି । ଏହି ଯୋଜନା ଅଧୀନରେ ୧୩ଶହ ପରିବାରର ଛାତ ଉପରେ ସୌର ପ୍ୟାନେଲ୍‍ ସ୍ଥାପନ କରାଯାଇଛି । ଶତକଡ଼ା ୬୦ରୁ ୧୦୦ ଭାଗ ବିଦ୍ୟୁତ୍‍ ଖର୍ଚ୍ଚ ହ୍ରାସ କରିବା ଲକ୍ଷ୍ୟରେ ଏହି ପଦକ୍ଷେପ ନିଆଯାଇଛି । ପ୍ରଧାନମନ୍ତ୍ରୀ ମହେଶ୍ୱରୀ ମନ୍ଦିର ପରିଦର୍ଶନ କରିବେ ଏବଂ ବିଶ୍ୱପ୍ରସିଦ୍ଧ ମୋଧେରା ସୂର୍ଯ୍ୟ ମନ୍ଦିରରେ ପୂଜାର୍ଚ୍ଚନା କରି ସୌରପ୍ରକଳ୍ପର ଶୁଭାରମ୍ଭ କରିବେ ।