ସମାଜ ପୋର୍ଟାଲ ଡେସ୍କ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୟୁଟୁବ୍ ଏବଂ ଇନ୍ଷ୍ଟାଗ୍ରାମ୍ ସମେତ ବିଭିନ୍ନ ସାମାଜିକ ଗଣମାଧ୍ୟମ ମଞ୍ଚରୁ ଓହରି ଯିବା ପାଇଁ ଚିନ୍ତା କରୁଥିବା ନେଇ ଏକ ଟ୍ୱିଟରୁ ଜଣାପଡିଛି। ଗତକାଲି ଏକ ଟ୍ୱିଟ୍ ଯୋଗେ ମୋଦୀ ସାମାଜିକ ଗଣମାଧ୍ୟମରୁ ଓହରି ଯିବା ପାଇଁ ତାଙ୍କର ଇଚ୍ଛା ବିଷୟରେ ଦେଶକୁ ସୂଚନା ଦେଇଛନ୍ତି। ଏହି ଟ୍ୱିଟ୍ର ଗୋଟିଏ ମୁହୂର୍ତ୍ତ ପରେ ପ୍ରଧାନମନ୍ତ୍ରୀଙ୍କର ଏଭଳି ଭାବନାରେ ଜନସାଧାରଣ ଗଭୀର ଭାବେ ମର୍ମାହତ ହୋଇ ପ୍ରତିକ୍ରିୟା ଦେଇଥିବା ବେଳେ ଲକ୍ଷ ଲକ୍ଷ ଫଲୋଅର୍ ‘ନୋ ସାର୍’ ବୋଲି ଏହି ଟ୍ୱିଟ୍ର ଉତ୍ତର ଦେଇଛନ୍ତି।
This Sunday, thinking of giving up my social media accounts on Facebook, Twitter, Instagram & YouTube. Will keep you all posted.
— Narendra Modi (@narendramodi) March 2, 2020
ଗୋଟିଏ ଘଣ୍ଟା ମଧ୍ୟରେ ମୋଦୀଙ୍କର ଏହି ପୋଷ୍ଟ ୨୬ହଜାର ଥର ରି-ଟ୍ୱିଟ୍ କରାଯାଇଛି। ପ୍ରଧାନମନ୍ତ୍ରୀଙ୍କର ଟ୍ୱିଟରରେ ୫୩ଦଶମିକ ୩ ମିଲିୟନ୍ ଫଲୋଅର ଥିବା ବେଳେ ଫେସ୍ବୁକରେ ୪୩ ମିଲିୟନ୍ ଫଲୋଅର ଅଛନ୍ତି। ସେହିପରି ଇନ୍ଷ୍ଟାଗ୍ରାମରେ ସମଗ୍ର ବିଶ୍ୱରେ ମୋଦୀଙ୍କର ସର୍ବାଧିକ ୩୦ ମିଲିୟନ୍ ଫଲୋଅର ଅଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କର ଏବେ ୧୪ଦଶମିକ୍ ୯ ମିଲିୟନ୍ ଫଲୋଅର ଥିବା ବେଳେ ପୂର୍ବ ରାଷ୍ଟ୍ରପତି ବାରାକ ଓବାମାଙ୍କର ୨୪ଦଶମିକ୍ ୮ ମିଲିୟନ୍ ଇନ୍ଷ୍ଟାଗ୍ରାମ୍ ଫଲୋଅର ଅଛନ୍ତି। ଟ୍ୱିଟରରେ ଯେଉଁ ଭାରତୀୟମାନଙ୍କୁ ଫଲୋ କରାଯାଉଛି ସେଥିରେ ମୋଦୀ ଶୀର୍ଷ ସ୍ଥାନରେ ଅଛନ୍ତି। ସେ ୨୦୦୯ ଜାନୁଆରୀରେ ଟ୍ୱିଟରରେ ସାମିଲ ହୋଇଥିଲା ବେଳେ ସେହି ସମୟରେ ଖୁବ୍ କମ୍ ରାଜନେତା ଏହି ସାମାଜିକ ଗଣମାଧ୍ୟମ ମଞ୍ଚକୁ ବ୍ୟବହାର କରୁଥିଲେ। ମୋଦୀ ହେଉଛନ୍ତି ତୃତୀୟ ବିଶ୍ୱସ୍ତରୀୟ ନେତା ଯାହାଙ୍କର ଟ୍ୱିଟରରେ ୫୦ ମିଲିୟନ୍ରୁ ଅଧିକ ଫଲୋଅର ଅଛନ୍ତି। ବାରାକ ଓବାମା ପ୍ରଥମ ସ୍ଥାନରେ ରହିଥିବା ବେଳେ ଡୋନାଲ୍ଡ ଟ୍ରମ୍ପ୍ ଦ୍ୱିତୀୟ ସ୍ଥାନରେ ରହିଛନ୍ତି।
