ଆଠଗଡ : ଆଠଗଡ ବ୍ଲକ ମହାତ୍ମାଗାନ୍ଧି ଜାତୀୟ ନିଶ୍ଚିତ କର୍ମନିଯୁକ୍ତି ଯୋଜନା ଅନ୍ତର୍ଭୁକ୍ତ କାର୍ଯ୍ୟକ୍ରମରେ ଜୀବିକା ମିଶନ ଓ ଉଦ୍ୟାନ କୃଷି ବିଭାଗ ପକ୍ଷରୁ ୩ନଂ ଜୋନ ଅନ୍ତର୍ଗତ ୧୨ଟି ପଞ୍ଚାୟତର ମହିଳା ସ୍ୱୟଂ ସହାୟକ ଗୋଷ୍ଠୀ ଗୁଡିକୁ ଚାରା ବଣ୍ଟନ କରାଯାଇଛି । କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କ ନିର୍ଦ୍ଦେଶକ୍ରମେ ଜୱାଦ୍ ବାତ୍ୟାରେ କ୍ଷତିଗ୍ରସ୍ତ ହୋଇଥିବା ମହିଳା ଚାଷୀମାନଙ୍କୁ ଉନ୍ନତମାନର ଆମ୍ବ, ପଣସ ଓ ଲେମ୍ବୁ ଗଛ ଚାରା ବଣ୍ଟନ କରାଯାଇଥିଲା । ୩୦୦ମହିଳା ଚାଷୀଙ୍କୁ ଏହିସବୁ ଚାରା ଏବଂ ୬୦୦ମହିଳା ଚାଷୀଙ୍କୁ ପନିପରିବା ମଞ୍ଜି ବଣ୍ଟନ କରାଯାଇଥିଲା । ରବିବାର କନ୍ଦରପୁର ପଞ୍ଚାୟତ କାର୍ଯ୍ୟାଳୟରେ ଆୟୋଜିତ କାର୍ଯ୍ୟକ୍ରମରେ ମନ୍ତ୍ରୀଙ୍କ ବ୍ଲକ ପ୍ରତିନିଧି ରଞ୍ଜନ କୁମାର ଆଚାର୍ଯ୍ୟ ମୁଖ୍ୟ ଅତିଥି ଭାବେ ଯୋଗଦେଇ ରାଜ୍ୟସରକାର କୃଷକଙ୍କର ବିକାଶ ପାଇଁ ପ୍ରତିବଦ୍ଧ ଥିବା ପ୍ରକାଶ କରିଥିଲେ । ଏଥିରେ ଜିଲ୍ଲା ପରିଷଦ ସଭ୍ୟ ବଳଭଦ୍ର ବାଘ, ବ୍ଲକ ବିଜେଡି ସଭାପତି ରବିନ୍ଦ୍ରନାଥ ରାଉତ, ଉଦ୍ୟାନକୃଷି ବିଭାଗ ଅଧିକାରୀ ଧନଞ୍ଜୟ ରାଉତ, କୃଷକ ନେତା ନିରାକାର ଲେଙ୍କା, ପ୍ରମୋଦ କୁମାର ସେଠୀ ଓ ମୁରଲୀଧର ବେହେରା ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇ ଏହି ଚାରା ଓ ମଞ୍ଜି ଦ୍ୱାରା ମହିଳା ଚାଷୀମାନେ ଉପକୃତ ହୋଇପାରିବେ ବୋଲି ଆଶାବ୍ୟକ୍ତ କରିଥିଲେ । ଏହି କାର୍ଯ୍ୟକ୍ରମରେ ୧୨ଟି ପଞ୍ଚାୟତର ସରପଞ୍ଚ ଓ ସମିତି ସଭ୍ୟଙ୍କ ସମେତ ବହୁ କୃଷକ ଉପସ୍ଥିତ ଥିଲେ।
Comments are closed.