ପିପିଲି :ଡେଲାଙ୍ଗ ରତନପୁର ଗ୍ରାମର ୧୧ ବର୍ଷୀୟ ନାବାଳକ ଆଶୀର୍ବାଦ ସାହୁଙ୍କୁ ଅପହରଣ ପରେ ଅତି ଜଘନ୍ୟ ଭାବେ ହତ୍ୟା କରାଯିବା ଘଟଣାରେ ଦୋଷୀ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଛି ସିପିଆଇ(ଏମ୍ଏଲ୍) ଲିବରେସନ ର ତଥ୍ୟ ଅନୁସନ୍ଧାନକାରୀ ଦଳ। ଶୁକ୍ରବାର ସିପିଆଇ(ଏମ୍ଏଲ୍) ଲିବରେସନ, ଓଡିଶା ର ରାଜ୍ୟ ସଂପାଦକ ଯୁଧିଷ୍ଠୀର ମହାପାତ୍ରଙ୍କ ନେତୃତ୍ୱରେ ରାଜ୍ୟ କମିଟି ସଭ୍ୟ ରାଧାକାନ୍ତ ସେଠୀ, ମହେନ୍ଦ୍ର ପରିଡା, ବରିଷ୍ଠ ନେତା ଅଶୋକ ପ୍ରଧାନ, ସତ୍ୟମନୁ ପ୍ରଧାନ, ତ୍ରିଲୋଚନ ବେହେରା, ରବିନ୍ଦ୍ର ସ୍ୱାଇଁ, ବଂଶୀଧର ପରିଡା, କିଶାନ ପଟ୍ଟନାୟକ ପ୍ରମୁଖ ମୃତ ଆଶୀର୍ବାଦଙ୍କ ପରିବାରକୁ ଭେଟି ସମବେଦନା ଜଣାଇଥିଲେ। ପରିବାରସଦସ୍ୟ ଓ ଗ୍ରାମବାସୀଙ୍କ ଠାରୁ ଘଟଣା ସଂପର୍କରେ ସେମାନେ ସମସ୍ତ କଥା ପଚାରି ବୁଝିବା ସହ ଘଟଣାସ୍ଥଳ ପରିଦର୍ଶନ କରି ବିଭିନ୍ନ ତଥ୍ୟ ସଂଗ୍ରହ କରିଥିଲେ।
ସେମାନେ ପିପିଲି ଏସ୍ଡିପିଓ ଦେବାଶିଷ ମିଶ୍ରଙ୍କୁ ସାକ୍ଷାତ କରି ଏହି ମାମଲାର ତ୍ୱରିତ ବିଚାର ସହ ଦୋଷୀ ବିରୋଧରେ କଠୋର କାର୍ଯ୍ୟନୁଷ୍ଠାନ ପାଇଁ ଦାବି କରିଥିଲେ। ଡେଲାଙ୍ଗ ଅଞ୍ଚଳରେ ଚାଲିଥିବା ବ୍ରାଉନସୁଗାର ଓ ଚୋରା ନିଶାକାରବାରକୁ ସଂପୂର୍ଣ୍ଣ ବନ୍ଦ କରିବା ଦିଗରେ ପୁଲିସ ତୁରନ୍ତ ଆବଶ୍ୟକ ପଦକ୍ଷେପ ନେବାକୁ ସେମାନେ ଦାବି ରଖିଥିଲେ। ଏହି ତଥ୍ୟ ଅନୁସନ୍ଧାନକାରୀ ଦଳ ସହିତ ଜାତୀୟ ଦଳିତ ଆଦିବାସୀ ମାଇନୋରିଟି ମହାସଂଘର ରାଜ୍ୟ ସଭାପତି ବିଜୟ କୁମାର ସେଠୀ ଉପସ୍ଥିତ ଥିଲେ।
