ପିପିଲି : ପିପିଲି ପୌରାଞ୍ଚଳ ଅନ୍ତର୍ଗତ ପଣ୍ଡାବଜାର ଠାରେ ଥିବା ଏକ ଦୋକାନ ମଧ୍ୟକୁ ଏକ ହାଇୱା ଗାଡି ମାଡିଯିବା ଫଳରେ ଦୋକାନର ବ୍ୟାପକ କ୍ଷତି ଘଟିଥିବା ସୂଚନା ମିଳିଛି। ଶୁକ୍ରବାର ବିଳମ୍ବିତ ରାତିରେ ଏକ ବଡ ପଥର ବୋଝେଇ ହାଇୱା ଟ୍ରକ ଖୋର୍ଦ୍ଧାରୁ ଅସ୍ତରଙ୍ଗ ଅଭିମୁଖେ ଯାଉଥିବା ବେଳେ ପିପିଲି ପଣ୍ଡାବଜାର ଠାରେ ଦୁର୍ଘଟଣାଗ୍ରସ୍ତ ହୋଇଥିଲା। ସମ୍ମୁଖରେ ଯାଉଥିବା ଏକ ଅଜଣା ଗାଡି ସହ ଉକ୍ତ ହାଇୱା ଧକ୍କାଲାଗିବା ଫଳରେ ଗାଡିର ସମ୍ମୁଖଭାଗ ସଂପୂର୍ଣ୍ଣ ଭାଙ୍ଗିରୁଜି ଯାଇଥିଲା। ଫଳରେ ଗାଡିଟି ନିୟନ୍ତ୍ରଣ ହରାଇ ରାସ୍ତାର ବାମପାଶ୍ୱର୍କୁ ମାଡିଯିବା ସହ ଏକ ବିଦ୍ୟୁତ୍ ଖୁଣ୍ଟରେ ଧକ୍କା ଲାଗି ରାସ୍ତାପାଶ୍ୱର୍ରେ ଥିବା ଦୋକାନ ମଧ୍ୟରେ ପଶିଯାଇଥିଲା। ସ୍ଥାନୀୟ ଲୋକେ ଗାଡି ମଧ୍ୟରୁ ଚାଳକକୁ ଉଦ୍ଧାର କରିଥିବା ବେଳେ ପରେ ଚାଳକ ସେଠାରୁ ଫେରାର ହୋଇଯାଇଥିବା ଜଣାଯାଇଛି। ଏହି ଦୁର୍ଘଟଣାରେ ଦୋକାନର ସମ୍ମୁଖଭାଗ ସଂପୂର୍ଣ୍ଣ ଭାଙ୍ଗି ଯାଇଛି। ପୁଲିସ ଦୁର୍ଘଟଣାଗ୍ରସ୍ତ ହାଇୱା ଟ୍ରକ୍କୁ ଜବତ କରି ଘଟଣାର ତଦନ୍ତ ଚଳାଇଛି।
