ମାନିଲା: କରୋନାଠାରୁ ବର୍ତ୍ତିବା ଲାଗି ଏକମାତ୍ର ବିକଳ୍ପ ସଚେତନତା। ଘରେ ରହିବା ସହିତ ସାମାଜିକ ଦୂରତ୍ଵ ରକ୍ଷା କଲେ କରୋନାଠାରୁ ବିଜୟ ମିଳିପାରିବ। କିନ୍ତୁ ଲୋକେ ସଚେତନ ହେଉନାହାନ୍ତି। କେବଳ ଭାରତରେ ନୁହେଁ, ଅନ୍ୟ ଦେଶରେ ବି ସମାନ ସ୍ଥିତି। ତେଣୁ ଲକ୍ଡାଉନକୁ କଡ଼ାକଡ଼ି ଭାବେ ପାଳନ କରିବା ସହିତ ଏହାକୁ ଉଲ୍ଲଂଘନ କଲେ ଗୁଳି କରିବାକୁ ନିର୍ଦେଶ ଦେଇଛନ୍ତି ଫିଲିପାଇନ୍ସ ରାଷ୍ଟ୍ରପତି ରୋଡ୍ରିଗୋ ଦୁଟର୍ଟେ। ସେ ତାଙ୍କ ସରକାର, ପୁଲିସ ଏବଂ ପ୍ରଶାସନକୁ କହିଛନ୍ତି ଯେ, ଯିଏ କରୋନା ଭୂତାଣୁ ପାଇଁ ଲାଗୁ ହୋଇଥିବା ଲକ୍ଡାଉନ ନିୟମ ପାଳନ କରୁନାହାନ୍ତି, କୌଣସି ସମସ୍ୟା ସୃଷ୍ଟି କରୁଛନ୍ତି, ସେମାନଙ୍କୁ ତୁରନ୍ତ ଗୁଳି କରିଦିଅ। ସେ ଦେଶବାସୀଙ୍କୁ କହିଛନ୍ତି, ବର୍ତ୍ତମାନ ସମୟରେ ସରକାରଙ୍କ ଆଦେଶକୁ ପାଳନ କର। କୌଣସି ସ୍ବାସ୍ଥ୍ୟକର୍ମୀ, ଡାକ୍ତରଙ୍କୁ କ୍ଷତି ପହଞ୍ଚାଅ ନାହିଁ। ଏଭଳି କଲେ ତାହା ଗମ୍ଭୀର ଅପରାଧ ହେବ। ଏଥିପାଇଁ ମୁଁ ପୁଲିସ ଏବଂ ସୁରକ୍ଷା କର୍ମୀଙ୍କୁ ଆଦେଶ ଦେଉଛି ଯେ ଯେଉମାନେ ଲକ୍ଡାଉନରେ ସମସ୍ୟା ସୃଷ୍ଟି କରିବେ ତାଙ୍କୁ ତୁରନ୍ତ ଗୁଳି କରିଦିଅ। ତେବେ ରୋଡ୍ରିଗୋ ଏଭଳି ବିବାଦୀୟ ଆଦେଶ ଦେବା ପ୍ରଥମ ଘଟଣା ନୁହେଁ। ୨୦୧୬-୧୭ରେ ବି ସେ ଡ୍ରଗ୍ସ ବ୍ୟବସାୟୀମାନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନ ନେଇ ସିଧା ଗୁଳି କରିଦେବାକୁ ପୁଲିସକୁ ନିର୍ଦେଶ ଦେଇଥିଲେ।
ସୂଚନାଯୋଗ୍ୟ, ଫିଲିପାଇନ୍ସରେ ବର୍ତ୍ତମାନ ୨୩୧୧ରୁ ଅଧିକ ଲୋକ କରୋନା ଦ୍ବାରା ଆକ୍ରାନ୍ତ ହୋଇଥିବାବେଳେ ୯୬ ଜଣ ପ୍ରାଣ ହରାଇଛନ୍ତି।
