ପାଟଣା: ଆଜି ୨୦ ନଂ ଜାତୀୟ ରାଜପଥ ଅନ୍ତର୍ଗତ ଢେଙ୍କିକୋଟ ଓଭର ବ୍ରିଜ ଉପରେ ମର୍ମନ୍ତୁଦ ସଡକ ଦୁର୍ଘଟଣାରେ ୨ବାଇକି ଆରୋହୀଙ୍କ ମୃତ୍ୟୁ ଘଟିଛି । ଓଭର ବ୍ରିଜ ଉପରେ ଠିଆ ହୋଇ ରହିଥିବା ଏକ ୧୨ ଚକିଆ ଟ୍ରକ ପଛରେ କେନ୍ଦୁଝରରୁ ଘଟଗାଁ ଫେରୁଥିବା ଏକ ବାଇକ୍ ପିଟି ହୋଇଯାଇଥିଲା। ଫଳରେ ଘଟଣା ସ୍ଥଳରେ ୨ ଜଣ ବାଇକ ଆରୋହୀ ପ୍ରାଣ ହରାଇଛନ୍ତି। ମୃତକ ୨ ଜଣ ଘଟଗାଁ ମୁଖ୍ୟାଳୟ ମୁକୁନ୍ଦପୁରପାଟଣା ଗ୍ରାମର ଲୁଲୁ ସେଠୀ (୨୫) ଏବଂ ଯାଜପୁର ଜିଲା ଟମକାର ପ୍ରତାପ ମହରଣା (୨୬) ବୋଲି ଜଣାପଡିଛି ।
ଘଟଗାଁ ଥାନା ଏସଆଇ ତପନ କୁମାର ଜେନା ଘଟଣା ସ୍ଥଳରେ ପହଞ୍ଚି ଦୁର୍ଘଟଣା ଘଟାଇଥିବା ଟ୍ରକ ଓ ବାଇକକୁ ଜବତ କରି ଥାନାକୁ ନେଇଛନ୍ତି। ମୃତକଙ୍କ ମର ଶରୀର ଘଟଗାଁ ଡାକ୍ତରଖାନାକୁ ନିଆଯାଇଥିଲା। ପୁଲିସ ପକ୍ଷରୁ ମୃତଦେହ ବ୍ୟବଚ୍ଛେଦ ପରେ ସେମାନଙ୍କ ପରିବାରବର୍ଗଙ୍କୁ ହସ୍ତାନ୍ତର କରାଯିବ ବୋଲି ଜଣାପଡ଼ିଛି।
