ଡେସ୍କ: ପ୍ୟାରିସ୍ ଅଲିମ୍ପିକ୍ସ ୨୦୨୪ ଆଜି ରାତିରେ ଷ୍ଟାଡ୍ ଡି ଫ୍ରାନ୍ସରେ ସମାପନ ସମାରୋହ ସହିତ ଆନୁଷ୍ଠାନିକ ଭାବେ ଶେଷ ହେବ। ଭାରତୀୟ ସମୟ ଅନୁଯାୟୀ ଆଜି ରାତି ୧୨ଟା ୩୦ରେ ପ୍ରାୟ ୮୦ ହଜାର ଦର୍ଶକଙ୍କ ସମାଗମରେ ଏହି ସମାରୋହ ଆରମ୍ଭ ହେବ। ସମାପନ ସମାରୋହକୁ ‘ରେକର୍ଡସ୍’ ନାମରେ ନାମିତ କରାଯାଇଛି। ଏହି ସମାରୋହରେ ଆଥଲେଟଙ୍କ ସଫଳତା ଏବଂ ବିଶିଷ୍ଟ ଅଭିନେତା ଓ କଳାକାରଙ୍କ ଦ୍ୱାରା ଅନେକ କଳାତ୍ମକ ପ୍ରଦର୍ଶନ ପ୍ରଦର୍ଶିତ ହେବ।
ଭାରତ ପକ୍ଷରୁ ଦୁଇ ଥର ଅଲିମ୍ପିକ୍ସ ପଦକ ବିଜେତା ପିଆର ଶ୍ରୀଜେଶ ଏବଂ ମନୁ ଭାକରଙ୍କୁ ପରେଡ୍ ଅଫ୍ ନେସନ୍ସ ପାଇଁ ପତାକା ବାହକ ଭାବେ ମନୋନୀତ କରାଯାଇଛି। ନିଜର ଅସାଧାରଣ ଗୋଲ୍ କିପିଂ ଦକ୍ଷତା ପାଇଁ ‘ୱାଲ୍ ଅଫ୍ ଇଣ୍ଡିଆ’ ଭାବେ ପରିଚିତ ଶ୍ରୀଜେଶ ଚଳିତ ଅଲିମ୍ପିକ୍ସରେ ବ୍ରୋଞ୍ଜ ପଦକ ଜିତିବା ପରେ ହକିରୁ ଅବସର ନେଇଥିଲେ। ସ୍ୱାଧୀନ ଭାରତର ଇତିହାସରେ ପ୍ରଥମ ଭାରତୀୟ ଆଥଲେଟ୍ ଭାବେ ମନୁ ଭାକର ଅଲିମ୍ପିକ୍ସର ଗୋଟିଏ ସଂସ୍କରଣରେ ଦୁଇଟି ପଦକ ଜିତି ଇତିହାସ ରଚିଛନ୍ତି। ସମାପନ ସମାରୋହରେ ଅଲିମ୍ପିକ୍ସ ଜ୍ୟୋତିକୁ ଲିଭାଇ ଦିଆଯିବ ଏବଂ ଅଲିମ୍ପିକ୍ସ ପତାକାକୁ ଲସ୍ ଆଞ୍ଜେଲସ୍ ୨୦୨୮ ଆୟୋଜନ ସମିତିକୁ ହସ୍ତାନ୍ତର କରାଯିବ।
