ଅମୃତସର: ପଞ୍ଜାବର ଅମୃତସରରେ ଦଶହରା ସଂଧ୍ୟାରେ ଟ୍ରେନ୍ ଦୁର୍ଘଟଣାରେ ୬୧ ଜଣଙ୍କ ଜୀବନ ହାନି ଘଟିଥିବା ବେଳେ ୧୦୦ ଜଣ ଆହତ ହୋଇଛନ୍ତି । ଏହି ଘଟଣାକୁ ନେଇ ରାଜନୌତିକ ଦଳ ମଧ୍ୟରେ ଆରୋପ-ପ୍ରତ୍ୟାରୋପ ଲାଗି ରହିଥିବା ବେଳେ ରାମଲୀଳାର ଆୟୋଜକ କଂଗ୍ରେସ ନେତାଙ୍କ ପୁଅ ସୌରଭ ମଦାନକୁ ଧରିବା ପାଇଁ ପୁଲିସ ଛାନଭିନ୍ ଆରମ୍ଭ କରିଛି । ଏହି ଦୁର୍ଘଟଣା ପରେ ରାମଲୀଳା ମୁଖ୍ୟ ଆୟୋଜକ ସୌରଭ ଫେରାର ହୋଇ ଯାଇଥିବା ଜଣାପଡିଛି ।
ଅମୃତସରର ଦୁର୍ଘଟଣାର ତୁରନ୍ତ ପରେ ସୌରଭ ମଦାନ ଏକ ଗାଡିରେ ବସି ପଳାଇ ଯାଉଥିବା ଏକ ସିସିଟିଭି ଫୁଟେଜରେ ଦେଖିବାକୁ ମିଳିଛି । ପୁଲିସ ମୁଖ୍ୟ ଅଭିଯୁକ୍ତଙ୍କ ପ୍ରତି କାର୍ଯ୍ୟାନୁଷ୍ଠନ ଗ୍ରହଣ ନକରି ଅଜଣା ବ୍ୟକ୍ତି ନାମରେ ମାମଲା ରୁଜୁ କରିଥିବା ନେଇ ଅଭିଯୋଗ ହୋଇଛି। ସୂଚନାଯୋଗ୍ୟ, ବିଜୟା ଦଶମୀ ରାବଣ ପୋଡି ଦେଖିବାକୁ ସ୍ଥାନୀୟଲୋକ ଟ୍ରେନ୍ ଲାଇନ ଉପରେ ଛିଡା ହୋଇଥିଲେ । ଏହି ସମୟରେ ଦୃତଗତିରେ ଆସୁଥିବା ଏକ ଟ୍ରେନ ସେମାନ ଉପରେ ମାଡି ଯାଇଥିଲା।
- Advertisement -
