ଶାରଜା : ଚଳିତ ଟ୍ବେଣ୍ଟି୨୦ ବିଶ୍ବକପ୍ର ସେମିଫାଇନାଲରେ ପ୍ରବେଶ କରି ସାରିଥିବା ପାକିସ୍ତାନ ଗ୍ରୁପ୍-୨େର ତା’ର ୫ଟିଯାକ ମ୍ୟାଚ୍ ଜିତିପାରିଛି। ରବିବାର ସ୍କଟ୍ଲାଣ୍ଡ ବିପକ୍ଷରେେ ସୁପର-୧୨ ମ୍ୟାଚ୍ରେ ପାକିସ୍ତାନ ୭୨ ରନ୍ରେ ବିଜୟୀ ହୋଇଛି। ଫଳରେ ୫ରୁ ୫ଟିଯାକ ମ୍ୟାଚ୍ ଜିତି ସର୍ବାଧିକ ୧୦ ପଏଣ୍ଟ ସହ ପାକିସ୍ତାନ ଗ୍ରୁପ୍-୨ ଶୀର୍ଷରେ ରହିଛି। ପ୍ରଥମେ ବ୍ୟାଟିଂକରି ପାକିସ୍ତାନ ୪ ୱିକେଟରେ ୧୮୯ ରନ୍ କରିଥିଲା। ବାବର ଆଜମ୍ ଓ ସୋଏବ୍ ମାଲିକ୍ଙ୍କ ଅର୍ଦ୍ଧଶତକ ବଳରେ ପାକିସ୍ତାନର ଏହି ବିଶାଳ ସ୍କୋର୍ ସମ୍ଭବ ହୋଇଥିଲା। ପରେ ରିଚି ବେରିଂଟନଙ୍କ ଅପରାଜିତ ଅର୍ଦ୍ଧଶତକ ସତ୍ତ୍ବେ ସ୍କଟ୍ଲାଣ୍ଡ ୬ ୱିକେଟ ହରାଇ ୧୧୭ ରନ୍ କରି ପାରିଥିଲା। ସ୍କଟ୍ଲାଣ୍ଡ ୫ଟିଯାକ ମ୍ୟାଚ୍ରେ ପରାସ୍ତ ହୋଇଛି। ଗ୍ରୁପ୍-୨ ଶୀର୍ଷରେ ଥିବା ପାକିସ୍ତାନ ଗୁରୁବାର ୨ୟ ସେମିଫାଇନାଲରେ ଅଷ୍ଟ୍ରେଲିଆର ମୁକାବିଲା କରିବ। ବୁଧବାର ପ୍ରଥମ ସେମିଫାଇନାଲରେ ଇଂଲଣ୍ଡ ଓ ନ୍ୟୁଜିଲାଣ୍ଡ ମଧ୍ୟରେ ମୁକାବିଲା ହେବ।
ସ୍କଟ୍ଲାଣ୍ଡ ପାଇଁ ୧୯୦ ରନ୍ ଲକ୍ଷ୍ୟ ଅପହଞ୍ଚ ମନେ ହେଉଥିଲା। ୨୩ ରନ୍ର ଓପ୍ନିଂ ଭାଗିଦାରୀ ପରେ ଅଧିନାୟକ କାଏଲ୍ କୋଏଜର ୯ ରନ୍କରି ବିଦାୟ ନେଇଥିଲେ। ମାଥ୍ୟୁ କ୍ରସ୍ ୫ ରନ୍ କରିଥିଲେ। ୪୧ ରନ୍ରେ ସ୍କଟ୍ଲାଣ୍ଡ ୪ଟି ୱିକେଟ ହରାଇବା ପରେ ରିଚି ବେରିଂଟନ ଓ ମାଇକେଲ ଲିସ୍କ ୪୬ ରନ୍ ଯୋଡ଼ିଥିଲେ। ଲିସ୍କ ୧୪ ରନ୍ କରିଥିଲେ। ବେରିଂଟନ ଅର୍ଦ୍ଧଶତକ ହାସଲ କରି ୩୭ ବଲ୍ରୁ ଗୋଟିଏ ଛକା ଓ ୪ଟି ଚୌକା ସହ ୫୪ ରନ୍ କରି ଅପରାଜିତ ରହିଥିଲେ। ସଦ୍ଦାବ ଖାଁ ୨ଟି ୱିକେଟ ନେଇଥିଲେ।
ଟସ୍ ଜିତି ପାକିସ୍ତାନ ବ୍ୟାଟିଂ କରିଥିଲା। ୬ ଓଭର ପାୱରପ୍ଲେରେ ପାକିସ୍ତାନ ୩୫ ରନ୍ କରିବା ପରେ ମହମ୍ମଦ ରିଜ୍ୱାନ ୧୫ ରନ୍କରି ଆଉଟ ହୋଇଥିଲେ। ଫଖର ଜମାନ୍ ୮ ରନ୍ କରିଥିଲେ। ପରେ ଅଧିନାୟକ ବାବର ଆଜମ୍ ଓ ଅଭିଜ୍ଞ ମହମ୍ମଦ ହଫିଜ୍ ୩ୟ ୱିକେଟ ପାଇଁ ୫୩ ରନ୍ ଯୋଡ଼ିଥିଲେ। ବିସ୍ଫୋରକ ବ୍ୟାଟିଂକରି ହଫିଜ୍ ୧୯ ବଲ୍ରୁ ଗୋଟିଏ ଛକା ଓ ୪ଟି ଚୌକା ସହ ୩୧ ରନ୍ କରିଥିଲେ। ୧୨ ଓଭରରେ ପାକିସ୍ତାନ ୭୫ ରନ୍ କରିଥିବା ବେଳେ ଶେଷ ୮ ଓଭରରେ ବିଧ୍ବଂସୀ ବ୍ୟାଟିଂକରି ୧୧୪ ରନ୍ ଯୋଗ କରିଥିଲା। ଏହା ସମ୍ଭବ ହୋଇଥିଲା ସୋଏବ୍ ମାଲିକ୍ଙ୍କ ଆକ୍ରମଣାତ୍ମକ ଇନିଂସ ଯୋଗୁଁ। ବାବର ଆଜମ୍ ଓ ମାଲିକ୍ ଦ୍ରୁତ ୩୦ ରନ୍ ଯୋଡ଼ିଥିଲେ। ଚଳିତ ବିଶ୍ବକପ୍ରେ ୫ମ ଇନିଂସରେ ୪ର୍ଥ ଅର୍ଦ୍ଧଶତକ ହାସଲ କରିଥିଲେ ଆଜମ୍। ସେ ୪୭ ବଲ୍ରୁ ୩ଟି ଛକା ଓ ୫ଟି ଚୌକା ସହ ୬୬ ରନ୍ କରିଥିଲେ। ମାଲିକ୍ ଇନିଂସର ଶେଷ ବଲ୍ରେ ଛକାମାରି ମାତ୍ର ୧୮ ବଲ୍ରୁ ଅର୍ଦ୍ଧଶତକ ପୂରଣ କରିଥିଲେ। ମାଲିକ୍ ୧୮ ବଲ୍ରୁ ୬ଟି ଛକା ଓ ଗୋଟିଏ ଚୌକା ସହ ୫୪ ରନ୍କରି ଅପରାଜିତ ଥିଲେ। କ୍ରିସ୍ ଗ୍ରିଭ୍ସ ୨ଟି ୱିକେଟ ନେଇଥିଲେ। ସୋଏବ୍ ମାଲିକ୍ ପ୍ଲେୟର ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ।
ସମସ୍ତ ଲିଗ୍ ମ୍ୟାଚ୍ ଜିତି ଗ୍ରୁପ୍ ଶୀର୍ଷରେ ପାକିସ୍ତାନ
Popular Categories
Previous article
Next article