ଇସଲାମାବାଦ: ଆଜି ପାକିସ୍ତାନବାସୀଙ୍କୁ ପ୍ରଧାନମନ୍ତ୍ରୀ ଇମ୍ରାନ ଖାନ ସମ୍ବୋଧନ କରି କହିଛନ୍ତି ଯେ ଅବିଶ୍ବାସ ପ୍ରସ୍ତାବ ଉପରେ ଆସନ୍ତା ରବିବାର ଭୋଟିଂ ହେବ। ଏପ୍ରିଲ ୩ ତାରିଖରେ ପାକିସ୍ତାନରେ ଆସିବାକୁ ଯାଉଛି ଚୂଡ଼ାନ୍ତ ନିଷ୍ପତ୍ତି। ମୋତେ ଇସ୍ତଫା ଦେବା ଲାଗି ବିଭିନ୍ନ ବର୍ଗରୁ କୁହାଯାଉଛି ବୋଲି ପ୍ରକାଶ କରିଛନ୍ତି। ଅପରପକ୍ଷରେ ଅବିଶ୍ବାସ ପ୍ରସ୍ତାବକୁ ନେଇ ପାକ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଦମ୍ଭୋକ୍ତି ପ୍ରକାଶ କରି କହିଛନ୍ତି ଯେ ମୁଁ ଇସ୍ତଫା ଦେବି ନାହିଁ, ଶେଷ ବଲ ପର୍ଯ୍ୟନ୍ତ ଖେଳିବି। ଭୋଟିଂ ପରେ ଆହୁରି ମଜଭୁତ ହୋଇ ଲଢ଼େଇ କରିବି ବୋଲି ସେ ପ୍ରକାଶ କରିଛନ୍ତି।
ଇମ୍ରାନ ଖାନଙ୍କ ସରକାରକୁ ସମର୍ଥନ କରୁଥିବା ସହଯୋଗୀ ଦଳ ହାତ ଛାଡିଦେଇଛନ୍ତି । ତେଣୁ ସଂସଦରେ ସରକାର ଗଢିବା ପାଇଁ ଆବଶ୍ୟକ ଥିବା ମ୍ୟାଜିକ ନମ୍ବର ହରାଇସାରିଛନ୍ତି ଇମ୍ରାନ୍ । ଆଜି ପାକିସ୍ତାନ ସଂସଦରେ ପ୍ରଧାନମନ୍ତ୍ରୀ ଇମ୍ରାନ ଖାନ ସରକାର ବିରୋଧରେ ଆଗତ ଅନାସ୍ଥା ପ୍ରସ୍ତାବ ଉପରେ ଆଲୋଚନା ହେବାର ଥିଲା । କିନ୍ତୁ ନ୍ୟାସନାଲ ଆସେମ୍ବଲି କିଛି ସମୟ ଚାଲିବା ପରେ ଏପ୍ରିଲ ୩ ଯାଏ ସ୍ଥଗିତ ରଖାଯାଇଛି । ବିରୋଧୀ ସାଂସଦ ଅନାସ୍ଥା ପ୍ରସ୍ତାବ ଉପରେ ଶୀଘ୍ର ଭୋଟିଂ କରିବାକୁ ଦାବି କରିବା ପରେ ସଂସଦ ଅଧିବେଶନକୁ ସ୍ଥଗିତ ରଖାଯାଇଛି ।
