ସମାଜଲାଇଭ ଡେସ୍କ: ପାକିସ୍ତାନ ସେନାର ଫିଲ୍ଡ ମାର୍ଶଲ ଅସିମ ମୁନିରଙ୍କୁ ଦେଶର ପ୍ରଥମ ସିଡିଏଫ ବା ଚିଫ ଅଫ ଡିପେନ୍ସ ଫୋର୍ସ କରିବା ଲାଗି ସମ୍ବିଧାନରେ ସଂଶୋଧନ କରାଯାଇଛି। ହେଲେ ପାକ୍ ପ୍ରଧାନମନ୍ତ୍ରୀ ଶେହବାଜ ଶରିଫ ଏହା ଚାହୁଁନାହାନ୍ତି। ମୁନିରଙ୍କୁ ସିଡିଏଫ ଭାବେ ଦାୟିତ୍ଵ ଦେବା ଲାଗି ଆବଶ୍ୟକ ପଡ଼ୁଥିବା ବିଜ୍ଞପ୍ତିରେ ଶରିଫ ଦସ୍ତଖତ ନ କରିବା ତାଙ୍କର ପ୍ରକୃତ ଉଦ୍ଦେଶ୍ୟକୁ ପଦାରେ ପକାଇଛି। ଏହା କହିଛନ୍ତି ଲେଖକ ତଥା ଜାତୀୟ ନିରାପତ୍ତା ଉପଦେଷ୍ଟା ବୋର୍ଡ(ଏନଏସଏବି) ସଦସ୍ୟ ତିଳକ ଦେବାଶର।
ଦେବାଶର କହିଛନ୍ତି, ଶରିଫ ଉଦ୍ଦେଶ୍ୟମୂଳକ ଭାବେ ଦେଶ ବାହାରେ ରହୁଛନ୍ତି। ଏହାର ପଛର କାରଣ ହେଉଛି ଦେଶର ପ୍ରଥମ ସିଡିଏଫଙ୍କ ନିଯୁକ୍ତି ସମ୍ପର୍କିତ ବିଜ୍ଞପ୍ତି। ଅସିମ ମୁନିର ସିଡିଏଫ ହେଲେ ସେ ଦେଶର ଇତିହାସରେ ସବୁଠୁ ଶକ୍ତିଶାଳୀ ସେନାମୁଖ୍ୟ ଭାବେ ଗଣାଯିବେ। ଯାହା ଚାହୁଁନାହାନ୍ତି ଶରିଫ।
ଦେବାଶର କହିଛନ୍ତି, ବିଜ୍ଞପ୍ତିରେ ଦସ୍ତଖତ ନ କରିବା ଲାଗି ଶରିଫ ପ୍ରଥମେ ବାହାରିନ ଯାଇଥିଲେ। ସେଠାରୁ ସ୍ବଦେଶ ଫେରିବା କଥା। କିନ୍ତୁ ସେ ବାହାରିନରୁ ଲଣ୍ଡନ ଚାଲିଗଲେ। ଚତୁରତାର ସହିତ ସେ ଏଭଳି କରୁଛନ୍ତି। ମୁନିରଙ୍କୁ ୫ ବର୍ଷ ପାଇଁ ଏତେ ଶକ୍ତିଶାଳୀ ପଦବୀ ଦେବାକୁ ସେ ଚାହୁଁନାହାନ୍ତି ବୋଲି ଦେବାଶର କହିଛନ୍ତି।
