ଭବାନୀପାଟଣା : କଳାହାଣ୍ଡି ଜିଲ୍ଲାରେ ଆଜିଠାରୁ ରବି ଧାନ କ୍ରୟ ପାଇଁ ମଣ୍ଡି ଆରମ୍ଭ ହେଇଛି। ଆଜି ସଦର ବ୍ଲକ୍ ଅନ୍ତର୍ଗତ କର୍ଲାପଡ଼ା ମଣ୍ଡିରେ ପୂଜାର୍ଚ୍ଚନା ପରେ ଧାନ କିଣା ଆରମ୍ଭ ହୋଇଛି। ସଦର ଉପଜିଲ୍ଲାପାଳ ପ୍ରଭାତ କୁମାର ପରିଡ଼ା ମଣ୍ଡି ଉଦ୍ଘାଟନ କରିଥିବାବେଳେ ଜିଲ୍ଲା ମୁଖ୍ୟ ଯୋଗାଣ ଅଧିକାରୀ ପବିତ୍ର କୁମାର ସାହୁଙ୍କ ସମେତ ଅନ୍ୟ ଯୋଗାଣ ବିଭାଗ, ସମବାୟ ବିଭାଗ, ଆରଏମସି ଅଧିକାରୀ ମାନେ ଉପସ୍ଥିତ ଥିଲେ। ପ୍ରଥମ ଦିନରେ କର୍ଲାପଡା ଅଞ୍ଚଳର ୬ ଜଣ ଚାଷୀଙ୍କ ପ୍ରାୟ ୩୮୫ କ୍ଵିଣ୍ଟାଲ ଧାନ ସମେତ ଦାଦପୂର୍ ଏବଂ ଫରଙ୍ଗ ମଣ୍ଡିରେ ମିଶି ଜିଲ୍ଲାରେ ମୋଟ ୯ ଜଣ ଚାଷୀଙ୍କଠାରୁ ୬୦୨ କ୍ଵିଣ୍ଟାଲ ଧାନ କିଣାଯାଇଛି। ଦାସୀଗାଁ ମଣ୍ଡିରେ ପୂଜାର୍ଚ୍ଚନା ପରେ ଧର୍ମଗଡ ଉପ ଜିଲ୍ଲାପାଳ ଧିମାନ ଚକମା ମଣ୍ଡି ଉଦ୍ଘାଟନ କରିଥିବାବେଳେ ଜୁନାଗଡ଼ , ନକଟିଗୁଡ଼ା , ତଳଜାରିଂ ଆଦି ସ୍ଥାନରେ ଆନୁଷ୍ଠାନିକ ଭାବେ ମଣ୍ଡି ଉଦ୍ଘାଟନ ହେଇଛି। ଆସନ୍ତା ଦୁଇ ତିନିଦିନ ମଧ୍ୟରେ ଜିଲ୍ଲାର ସମସ୍ତ ମଣ୍ଡିରେ ରବି ଧାନ କିଣା ନିୟମିତ ଭାବେ ଆରମ୍ଭ ହେବ ବୋଲି ଯୋଗାଣ ବିଭାଗ ଏବଂ ଆରଏମସି ସୂତ୍ରରୁ ଜଣାପଡିଛି । ସୂଚନାଯୋଗ୍ୟ ଚଳିତ ରବି ଋତୁରେ ଜିଲ୍ଲାର ୪୮,୮୧୮ ଜଣ ପଞ୍ଜୀକୃତ ଚାଷୀଙ୍କ ଠାରୁ ୨୦ ଲକ୍ଷ ୬୦ ହଜାର କ୍ଵିଣ୍ଟାଲ ଧାନ ସଂଗ୍ରହ କରିବାକୁ ଲକ୍ଷ୍ୟ ଧାର୍ଯ୍ୟ ହୋଇଛି। ଜିଲ୍ଲାର ୧୪୫ ଟି ଧାନ ମଣ୍ଡିରେ ୬୪ ଟି ପେକ୍ସ ଏବଂ ୨୫ ଟି ସ୍ୱୟଂ ସହାୟକ ଗୋଷ୍ଠୀ ଦ୍ଵାରା ୧୪୫ ଟି ମଣ୍ଡି ରୁ ୮୮ ଜଣ ମିଲରଙ୍କ ମାଧ୍ୟମରେ ଧାନ ସଂଗ୍ରହ କରାଯିବାକୁ ପ୍ରଶାସନ ଲକ୍ଷ୍ୟ ଧାର୍ଯ୍ୟ କରିଛି।
Comments are closed.