ନୂଆଦିଲ୍ଲୀ: ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦ ସହିତ ଜାମ୍ମୁ ଓ କାଶ୍ମୀର ଏବଂ ଲଦାଖକୁ ପୃଥକ କେନ୍ଦ୍ର ଶାସିତ ପ୍ରଦେଶ ମାନ୍ୟତା ଦେବା ଲାଗି କେନ୍ଦ୍ର ସରକାର ନିଷ୍ପତି ନେବା ଫଳରେ ଗତ ୭୦ ବର୍ଷ ଧରି ଲୋକମାନେ ଭୋଗୁଥିବା ଭେଦଭାବ ଦୂର ହୋଇଛି ବୋଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ପ୍ରକାଶ କହିଛନ୍ତି। ଗୁରୁବାର ନୂଆଦିଲ୍ଲୀଠାରେ ଇନଷ୍ଟିଚ୍ୟୁଟ ଅଫ ଡିଫେନ୍ସ ଷ୍ଟଡିଜ ଆଣ୍ଡ ଆନାଲିସିସର ବାର୍ଷିକ ସାଧାରଣ ପରିଷଦ ବୈଠକକୁ ଉଦବୋଧନ ଦେଇ ରାଜନାଥ ସିଂ କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ସରକାରଙ୍କ ପ୍ରଥମ କାର୍ଯ୍ୟକାଳ ସମୟରେ ଏହି ପ୍ରସଙ୍ଗର ସ୍ଥାୟୀ ସମାଧାନ ଖୋଜିବା ଲାଗି ପ୍ରାରମ୍ଭିକ ପ୍ରସ୍ତୁତି କରାଯାଇଥିଲା। ସେ କହିଥିଲେ ଯେ ପଡ଼ୋଶୀ ଦେଶ ଏଥିରେ ଖୁସି ନାହିଁ ଏବଂ ଶାନ୍ତି ଭଙ୍ଗ କରିବା ଲାଗି ପ୍ରୟାସ କରୁଛି। ଆମ ସେନା ସୁରକ୍ଷା ଆହ୍ୱାନକୁ ଗ୍ରହଣ କରିଛି ଏବଂ ଯେକୌଣସି ପ୍ରକାର ବିପଦର ମୁକାବିଲା କରିବା ଲାଗି ସମ୍ପୂର୍ଣ୍ଣ ଭାବେ ପ୍ରସ୍ତୁତ ରହିଛି।
ଆଇଡିଏସଏକୁ ସାବଧାନତାପୂର୍ବକ ଏବଂ ପାଂଚଟି ଦିଗରୁ ବିଶ୍ଳେଷଣ କରିବା ଲାଗି ରାଜନାଥ ଆହ୍ୱାନ ଦେଇଛନ୍ତି। ଭୂମି, ବାୟୁ ଏବଂ ସମୁଦ୍ରରୁ ପାରମ୍ପରିକ ବିପଦ ବ୍ୟତୀତ ସାଇବର ଏବଂ ମହାକାଶ କ୍ଷେତ୍ରରେ ମଧ୍ୟ ନୂତନ ବିପଦ ସାମ୍ନାକୁ ଆସିଛି। ପ୍ରତିରକ୍ଷା ମନ୍ତ୍ରୀ କହିଥିଲେ ଯେ ସରକାର ପ୍ରଥମେ ପଡ଼ୋଶୀ ନୀତି ଆପଣାଇଥିଲେ, ଯାହା ଆମ ପଡ଼ୋଶୀ ଦେଶ ସହିତ ଭାରତକୁ ଲାଗିଥିବା ଭୂମି ଏବଂ ସାମୁଦ୍ରିକ ସୀମାକୁ ପ୍ରତିପାଦିତ କରୁଥିଲା। ପ୍ରଧାନମନ୍ତ୍ରୀ ମୋଦୀଙ୍କ ଦ୍ୱିତୀୟ କାର୍ଯ୍ୟକାଳରେ ମାଳଦ୍ୱୀପକୁ ତାଙ୍କର ପ୍ରଥମ ଯାତ୍ରା ଏବଂ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ମୋଜାମ୍ବିକ ଯାତ୍ରା ସମୟରେ ଏହାର ବିଶେଷ ପ୍ରଭାବ ପଡ଼ିଥିଲା।
