ସମାଜ ଡିଜିଟାଲ ଡେସ୍କ: ଶନିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ବସିଥିବା ନିତି ଆୟୋଗ ବୈଠକକୁ କୌଣସି ବିରୋଧୀ ଦଳର ମୁଖ୍ୟମନ୍ତ୍ରୀମାନେ ଯାଇ ନାହାନ୍ତି। ଏକମାତ୍ର ବିରୋଧୀ ମୁଖ୍ୟମନ୍ତ୍ରୀ ଭାବେ ମମତା ବାନାର୍ଜୀ ବୈଠକରେ ଯୋଗଦେଇଥିଲେ, ହେଲେ ତାଙ୍କୁ ଅଧିକ ସମୟ କହିବାକୁ ସୁଯୋଗ ଦିଆ ନ ଯିବାରୁ ସେ ଅଧାରୁ ଉଠି ଚାଲିଗଲେ। ଅନେକଙ୍କ ମନରେ ପ୍ରଶ୍ନ ଉଠୁଥିବ ନିତି ଆୟୋଗ ବୈଠକରେ ବିରୋଧୀ ଦଳର ମୁଖ୍ୟମନ୍ତ୍ରୀମାନେ କାହିଁକି ଯୋଗଦେଲେ ନାହିଁ। ତାହାର କାରଣ ବି ରହିଛି। ଭାରତୀୟ କମ୍ୟୁନିଷ୍ଟ ପାର୍ଟି (ସିପିଆଇ)ର ସାଧାରଣ ସମ୍ପାଦକ ଡି. ରାଜା କହିଛନ୍ତି ଯେ, ନିତି ଆୟୋଗ ଦେଶର ସମସ୍ତ ସରକାରୀ କ୍ଷେତ୍ରକୁ ଘରୋଇକରଣ କରିବା ଲାଗି ପ୍ରସ୍ତାବ ଦେଉଛି। ଏହି କାରଣ ଯୋଗୁ କୌଣସି ବିରୋଧୀ ଦଳର ମୁଖ୍ୟମନ୍ତ୍ରୀମାନେ ବୈଠକକୁ ଗଲେନାହିଁ।
ରାଜା ଆହୁରି ପ୍ରଶ୍ନ କରିଛନ୍ତି ଯେ, ପ୍ରଥମେ ପ୍ରଧାନମନ୍ତ୍ରୀ ବିବୃତି ଦେବା ଉଚିତ, ଯୋଜନା ଆୟୋଗ(ପ୍ଲାନିଂ କମିଶନ)କୁ କାହିଁକି ଭାଙ୍ଗି ଦିଆଗଲା। ବିଜେପି ଯେତେବେଳେ କ୍ଷମତାକୁ ଆସିଲା, ସେମାନେ ପ୍ରଥମେ କ’ଣ କଲେ ନା ଯୋଜନା ଆୟୋଗକୁ ଭାଙ୍ଗିଦେଲେ। ନିତି ଆୟୋଗ ଗଠନ କଲେ। ନିତି ଆୟୋଗର କାର୍ଯ୍ୟ କ’ଣ ? ସେମାନେ କି ନୀତି ପ୍ରସ୍ତୁତ କରୁଛନ୍ତି ? ସରକାରଙ୍କୁ କ’ଣ ପ୍ରସ୍ତାବ ଦେଉଛନ୍ତି ? ମୋତେ ଯେତେଦୂର ଜଣା, ନିତି ଆୟୋଗ ସମସ୍ତ ସରକାରୀ କ୍ଷେତ୍ର(ପିଏସୟୁ)କୁ ଘରୋଇକରଣ କରିବାକୁ ପ୍ରସ୍ତାବ ଦେଉଛି। ଏହି କାରଣରୁ ହିଁ ଅନେକ ମୁଖ୍ୟମନ୍ତ୍ରୀ ବୈଠକକୁ ଆସିନାହାନ୍ତି ବୋଲି ରାଜା କହିଛନ୍ତି।
