ନୂଆଦିଲ୍ଲୀ : ଆଜିକାଲି ଓଲାର ଖରାପ ସମୟ ଚାଲିଛି । ପୂର୍ବରୁ ସାମାଜିକ ଗଣମାଧ୍ୟମରେ କୁଣାଲ କାମରାଙ୍କ ସହ ବିବାଦ ପରେ ଭାବିଶ ଅଗ୍ରଓ୍ବାଲଙ୍କୁ ଲୋକେ ଟ୍ରୋଲ୍ କରିଥିଲେ । ଏବେ ଏହାର ପ୍ରଭାବ କମ୍ପାନୀର ସେୟାର ଉପରେ ଦେଖିବାକୁ ମିଳୁଛି । ଏହା ପରେ ୭ ଅକ୍ଟୋବରରେ କମ୍ପାନୀ ସିକ୍ୟେରିଟି ଏକ୍ସଚେଞ୍ଜକୁ ଜଣାଇଛି କି ଓଲାକୁ ସେଣ୍ଟ୍ରାଲ କଞ୍ଜ୍ୟୁମର ପ୍ରୋଟେକ୍ସନ ଅଥୋରିଟି(ସିସିପିଏ) ତରଫରୁ କାରଣ ଦର୍ଶାଅ ନୋଟିସ୍ ମିଳିଛି । ଏବେ ଖବର ଆସିଛି କି ସଡକ ପରିବହନ ମନ୍ତ୍ରାଳୟ ମଧ୍ୟ ଓଲାର ଯାଞ୍ଚ କରିପାରେ, ଯେଉଁଥିପାଇଁ ଖୁବଶୀଘ୍ର ନିର୍ଦ୍ଦେଶାବଳୀ ଜାରି ହୋଇପାରେ ।
ଓଲା ଇଲେକ୍ଟ୍ରିକ ଇଭି ସ୍କୁଟରକୁ ନେଇ ସାମାଜିକ ଗଣମାଧ୍ୟମରେ ଲଗାତର ଗ୍ରାହକ ଅସନ୍ତୋଷ ପ୍ରକାଶ କରୁଛନ୍ତି । ଇଭି ସ୍କୁଟରର ସର୍ଭିସରେ ଗ୍ରାହକ ସମସ୍ୟା ଭୋଗୁଛନ୍ତି । ଏହାକୁ ନେଇ ସରକାରଙ୍କ ତରଫରୁ ପୂର୍ବରୁ କମ୍ପାନୀକୁ ନୋଟିସ୍ ହୋଇସାରିଛି । କମ୍ପାନୀକୁ ସେଣ୍ଟ୍ରାଲ କଞ୍ଜ୍ୟୁମର ପ୍ରୋଟେକ୍ସନ ଅଥୋରିଟି ତରଫରୁ କାରଣ ଦର୍ଶାଅ ନୋଟିସ୍ ମିଳିଛି ।
କମ୍ପାନୀ ସୂଚନା ଅନୁସାରେ ‘ସିସିପିଏ କାରଣ ଦର୍ଶାଅର ଜବାବ ଦେବା ପାଇଁ କମ୍ପାନୀକୁ ୧୫ ଦିନର ସମୟ ଦେଇଛି । ନିର୍ଦ୍ଧାରିତ ସମୟରେ ମଧ୍ୟରେ କମ୍ପାନୀ ଦସ୍ତାବିଜ ସହ ଜବାବ ଦେବ ।’ ନୋଟିସରେ କୁହାଯାଇଛି କି ଓଲା ଇଲେକ୍ଟ୍ରିକ୍ ତରଫରୁ କଞ୍ଜ୍ୟୁମର ପ୍ରୋଟେକ୍ସନ ଆକ୍ଟ ୨୦୧୯ର ଅନେକ ନିୟମର ଉଲ୍ଲଙ୍ଘନ କରାଯାଇଥିବା ଅଭିଯୋଗ ହୋଇଛି । ଅଥୋରିଟି ତରଫରୁ ନିର୍ମାଣ ସମ୍ବନ୍ଧୀୟ ତ୍ରୁଟି, ବୁକିଂ ରଦ୍ଦ ହେବା ପରେ ଫେରସ୍ତ ନକରିବା, ଖରାପ ସେବା ଯୋଗାଇବା ଭଳି ସମସ୍ୟା ଆସିବା ପରେ ଅଭିଯୋଗକୁ ଗୁରୁତର ସହ ନିଆଯାଇଛି । ସୂଚନାଯୋଗ୍ୟ ଗତ ବର୍ଷ ସେପ୍ଟେମ୍ବରରେ ଓଲା ଇଲେକ୍ଟ୍ରିକକୁ ନେଇ ଗ୍ରାହକଙ୍କ ତରଫରୁ ୧୦,୬୪୪ଟି ଅଭିଯୋଗ ଆସିଥିଲା ।
