ଭୁବନେଶ୍ବର: ରାଜ୍ୟର ବିଭିନ୍ନ ସ୍ଥାନରେ କାଳବୈଶାଖୀ ପ୍ରଭାବରେ ବିଜୁଳି ଘଡଘଡି ସହ ବର୍ଷା ହୋଇଛି। ଆଗକୁ ଆହୁରି ୪ଦିନ ପର୍ୟ୍ୟନ୍ତ କାଳବୈଶାଖୀ ଅନୁଭୂତ ହେବ। ବିଜୁଳି ଘଡଘଡି ବର୍ଷା ସାଙ୍ଗକୁ କୁଆପଥର ପଡିବ। ଘଣ୍ଟା ପ୍ରତି ୩୦ରୁ ୪୦ କିମି ବେଗରେ ପବନ ବହିବ। ଏଭଳି ପୂର୍ବାନୁମାନ କରିଛି ଭୁବନେଶ୍ବର ଆଞ୍ଚଳିକ ପାଣିପାଗ ବିଭାଗ। ଶନିବାର ଗଜପତି, ଗଞ୍ଜାମ, କନ୍ଧମାଳ, ମାଲକାନଗିରି, କୋରାପୁଟ, ନୟାଗଡ, କଟକ, ଢେଙ୍କାନାଳ, କେନ୍ଦୁଝର, ମୟୂରଭଞ୍ଜ, ବାଲେଶ୍ବର ଏବଂ ଭଦ୍ରକ ଜିଲାର ପ୍ରାୟ ସ୍ଥାନରେ କାଳବୈଶାଖୀ ହୋଇପାରେ। ବର୍ଷା ପବନ ଏବଂ ବିଜୁଳି ଘଡଘଡିକୁ ଲକ୍ଷ୍ୟ କରି ଉପରୋକ୍ତ ଜିଲାଗୁଡିକୁ ବିଭାଗ ପକ୍ଷରୁ ୟେଲୋ ୱାର୍ଣ୍ଣିଂ ଜାରି କରାଯାଇଛି।
କାଳବୈଶାଖୀ ପ୍ରଭାବରେ ସାରା ରାଜ୍ୟରେ ସର୍ବାଧିକ ତାପମାତ୍ରା କମିଛି। ୪ ଦିନ ହେଲା ପଶ୍ଚିମ ଓଡ଼ିଶାରେ ଗ୍ରୀଷ୍ମ ପ୍ରବାହ ଜାରି ରହି ଥିବାବେଳେ ଶୁକ୍ରବାର ସାମାନ୍ୟ ତାପମାତ୍ରା ହ୍ରାସ ପାଇଛି। ସୁନ୍ଦରଗଡରେ ସର୍ବାଧିକ ତାପମାତ୍ରା ସବୁଠୁ ଅଧିକ ୪୦ ଡିଗ୍ରୀ ରହିଛି। ଭବାନୀପାଟଣାରେ ୩୯.୫, ବଲାଙ୍ଗुର ଓ ଟିଟିଲାଗଡରେ ୩୯.୨, ମାଲକାନଗିରିରେ ୩୯ ଏବଂ ଭୁବନେଶ୍ବରରେ ୩୪.୯ ଡିଗ୍ରୀ ରହିଛି। ଆସନ୍ତା ୨୪ ଘଣ୍ଟାରେ ଆଭ୍ୟନ୍ତରୀଣ ଓଡ଼ିଶାରେ ସର୍ବାଧିକ ତାପମାତ୍ରା ୨ ଡିଗ୍ରୀ ପର୍ୟ୍ୟନ୍ତ ହ୍ରାସ ପାଇବ। ଭୁବନେଶ୍ବରରେ ବଜ୍ରପାତ ସହ ବର୍ଷା ହୋଇପାରେ। ଜିଲାପାଳମାନେ ସତର୍କ ରହିବାକୁ ପରାମର୍ଶ ଦେଇଛନ୍ତି ଏସ୍ଆରସି।
