ଲକ୍ଷ୍ମୀପୁର : କୋରାପୁଟ ଜିଲା ଲକ୍ଷ୍ମୀପୁର ବ୍ଲକର ସଦର ମହକୁମାରରେ ରହିଛି ଏକ ମିନି ଷ୍ଟାଡିୟମ। ଏଠାରେ ବିଭିନ୍ନ ରାଜନୈତିକ ଦଳର ବୈଠକ ସହିତ ଅନ୍ଯାନ୍ଯ ସରକାରୀ କାର୍ଯ୍ୟକ୍ରମ ଆଦି ଅନୁଷ୍ଠିତ ହେଉଛି। ତେବେ କିଛି ଦିନ ହେଲା ଏଠାରେ ଅନେକ ଗୁଡିଏ ଅଳିଆ ଆବର୍ଜନା ଗଦା ହେଉଥିବା ଦେଖିବାକୁ ମିଳୁଛି । ତେବେ ଅଳିଆ ଆବର୍ଜନା ପକାଇବା ପାଇଁ ଏହାଠାରୁ କିଛି ଦୂରରେ ଏକ ଡଂପି ଆଡ୍ ରହିଥିବାବେଳେ କିଏ କାହିଁକି ଏଠାରେ ଏଗୁଡ଼ିକୁ ପକାଇ ଷ୍ଟାଡିୟମକୁ ଅପରିଷ୍କାର କରୁଛି ତାହା ଜଣାପଡିନାହିଁ। ଅଳିଆ ଗୁଡିକ ପଡିବା ଦ୍ବାରା ଏହାର ଚତୁଃପାର୍ଶ୍ବ ଦୁର୍ଗନ୍ଧମୟ ପରିବେଶ ଯୋଗୁଁ ଅସ୍ବାସ୍ଥ୍ୟକର ପରିବେଶ ସୃଷ୍ଟି କରୁଛି। ଅନ୍ୟ ପକ୍ଷରେ ଏଠାରେ ଥିବା କେତେକ କୋଠରୀଗୁଡିକ ଖୋଲା ମେଲା ପଡିବା କାରଣରୁ ସେଠାରେ ବିଭିନ୍ନ ପ୍ରକାର ଅନୈତିକ କାର୍ଯ୍ୟ ହେଉଥିବା ଅଭିଯୋଗ ହେଉଛି। ବହୁ ଲକ୍ଷ ଟଙ୍କା ବ୍ଯୟରେ ଯେଉଁ ଷ୍ଟାଡିୟମଟି ନିର୍ମାଣ ହୋଇଛି ତାହା କୌଣସି କାର୍ଯ୍ୟରେ ଲାଗୁନାହିଁ। ବିଶେଷକରି ଖେଳ ପାଇଁ ନିର୍ମାଣ କରାଯାଇଥିଲେ ମଧ୍ୟ ଏଠାରେ କୌଣସି ଟୁର୍ଣ୍ଣାମେଣ୍ଟ ଆଦି ଅନୁଷ୍ଠିତ ହେଉନାହିଁ। ସେହିପରି ପଡିଆଟି ଖାଲ ଖମାରେ ପରିପୂର୍ଣ୍ଣ ସହିତ ବର୍ଷା ହେଲେ କାଦୁଅ ପଚପଚ ହୋଇପଡୁଛି। ଯେଉଁଥିପାଇଁ ପଡିଆଟି ଖେଳ ଉପଯୋଗୀ ହୋଇ ପାରୁନାହିଁ। ବ୍ଲକ ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଏହା କିପରି ଉପଯୋଗୀ ହୋଇପାରିବ ଓ ଅଳିଆ ଆବର୍ଜନାକୁ ହଟାଇବା ବ୍ଯବସ୍ଥା କରିବା ସହିତ ଖୋଲାମେଲା ପଡିଥିବା କୋଠରୀ ଗୁଡିକରେ ତାଲା ପକାଇ ଉପଯୁକ୍ତ ରକ୍ଷଣାବେକ୍ଷଣ ବ୍ଯବସ୍ଥା ହୋଇପାରିବ ସେଥିପାଇଁ ସାଧାରଣରେ ଦାବି ହେଉଛି।
Popular Categories
Previous article
Next article