ଆଠଗଡ : ଆଠଗଡ ସହରର ରାସରସିକପୁର ସାହି ପଛପଟ ପଡିଆ ନିକଟରେ ଚାଲିଥିବା ମୀନାବଜାର ଆବର୍ଜନାରେ ପରିପୂର୍ଣ୍ଣ ହୋଇ ପରିବେଶ ଦୂଷିତ ହେଉଛି । ଉକ୍ତ ପଡିଆରେ ୧୫ ଦିନରୁ ଉର୍ଦ୍ଧ୍ବ ସମୟ ଧରି ଏକ ମୀନାବଜାର ପଡିଥିଲା । ମୀନାବଜାର ବନ୍ଦ ହୋଇ ଏଠାରୁ ଚାଲିଯିବାର ପ୍ରାୟ ୬-୭ ଦିନ ବିତି ଯାଇଥିଲେ ମଧ୍ଯ ସେଠାରେ ଇତସ୍ତତଃ ହୋଇ ପଡିଥିବା ପର୍ଯ୍ୟାପ୍ତ ବର୍ଯ୍ୟବସ୍ତୁ ଓ ଆବର୍ଜନା ସଫେଇ ହୋଇନାହିଁ। ବହୁମାତ୍ରାରେ ପଲିଥିନ୍, ଜରି, କାଗଜ ଓ ପତ୍ର ଠୋଲା ଏବଂ ଅନ୍ଯାନ୍ଯ ଆବର୍ଜନା ପୁରା ପଡିଆରେ ବିଛାଡି ହୋଇ ପଡିଛି । ଏପରିକି ମୀନାବଜରରେ ବିକ୍ରି ହେଉଥିବା ଖାଦ୍ଯ ପଦାର୍ଥ ବିଭିନ୍ନ ସ୍ଥାନରେ ପଡିବା ଫଳରେ ପଚିଷଢି ଦୁର୍ଗନ୍ଧମୟ ପରିବେଶ ସୃଷ୍ଟି ହୋଇଛି। ଉକ୍ତ ପଡିଆର ଠିକ୍ ସାମ୍ନାରେ ଗୋପବନ୍ଧୁ ମହିଳା ସ୍ନାତକ କଲେଜ ଏବଂ ନିକଟରେ ରାସରସିକପୁର ୟୁଜିୟୁପି ସ୍କୁଲ ଓ ମହିଳା କନିଷ୍ଠ କଲେଜ ରହିଛି । ମୀନାବଜାରର ଆବର୍ଜନା ପବନରେ ଉଡି ନିକଟସ୍ଥ ମୁଖ୍ଯ ରାସ୍ତାରେ ଓ କଲେଜ ମଧ୍ଯରେ ପଡୁଥିବା ଦେଖାଯାଉଛି। ପରିବେଶ ପ୍ରଦୂଷଣ ପ୍ରତି ମୀନାବଜାର ମାଲିକ ଓ ଆୟୋଜକ ସଚେତନ ଥିବା ଭଳି ମନେ ହେଉନାହିଁ । ମୀନାବଜାର ପରିଚାଳନା କରୁଥିବା ଆୟୋଜକ ହୁଅନ୍ତୁ ଅବା ସ୍ଥାନୀୟ ଏନଏସି କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ ଉକ୍ତ ପଡିଆ ସଫେଇ ପାଇଁ ପଦକ୍ଷେପ ନେବାକୁ ବୁଦ୍ଧିଜୀବୀ ମହଲରେ ଦାବି ହେଉଛି।
Popular Categories
Previous article
Next article